თორნიკე შარაშენიძე - აზერბაიჯანისთვის ტერიტორიების დაბრუნების პრეცედენტი, იქნებ  გამოფხიზლებად იქცეს ჩვენი აფხაზი და ოსი თანამოქალაქეებისთვის

აზერბაიჯანისთვის ტერიტორიების დაბრუნების პრეცედენტი, იქნებ გამოფხიზლებად იქცეს ჩვენი აფხაზი და ოსი თანამოქალაქეებისთვის, იმიტომ, რომ ისინი დაინახავენ, მუდმივი არაფერი არ არის და როცა შენ, უსამართლო ომით ტერიტორიას მიიტაცებ და განახორციელებ ეთნიკურ წმენდას, ესე მარტივად ეს არ ჩაივლის, - ამის შესახებ პოლიტიკის ექსპერტმა თორნიკე შარაშენიძემ „პალიტრანიუსის“ გადაცემა „ნიუსრუმში“ განაცხადა.

ამასთან, შარაშენიძის შეფასებით, ქვეყნებს შორის მიღწეული შეთანხმებით საქართველოს უსაფრთხოებისთვის არაფერი არ იცვლება.

„ჩვენი უსაფრთხოებისთვის ბევრი არაფერი არ იცვლება, მაშინ როდესაც თბილისიდან 40 კმ-ში რუსული ბაზა დგას, ხოლო აზერბაიჯანისთვის ის იცვლება, რომ მან ისეთ წარმატებას მიაღწია, რომ ალიევმა კიდევ რამდენიმე ათწლეულით გაიმყარა პოზიციები. იმ ტერიტორიებზე, რომლებიც ამდენი ხანი აზერბაიჯანის არ იყო, რუსული სამხედროები ჩადგებიან თუ არა, სიმართლე, რომ გითხრათ დიდი კომპრომისი არ არის, იმიტომ, რომ რა ჯობდა მათთვის?! ეს ტერიტორიები დარჩენილიყო სომხეთის ხელში თუ გადასულიყო მათ ხელში და იქ ჩამდგარიყო რუსული სამშვიდობოები?! რა თქმა უნდა, აზერბაიჯანისთვის ამ ეტაპზე ეს ვარიანტი ჯობდა. მაგრამ რუსეთმა კიდევ ერთხელ დაანახა ყველას, რომ საბოლოო სიტყვა მაინც მას ეთქმის და ამაში გასაკვირი არაფერი არ არის, ქვეყანა, რომელსაც აქვს სამი სამხედრო ბაზა კავკასიის ტერიტორიაზე, ბუნებრივია მას უფრო მეტი სიტყვა ეთქმოდა, ვიდრე ნებისმიერ სხვას. რუსეთს სომხეთთან აქვს ორმხრივი ხელშეკრულება, რომლის მიხედვითაც რუსეთი დაიცავს სომხეთს, მაგრამ ეს ხელშეკრულება არ ფარავდა ყარაბაღს და მითუმეტეს ყარაბაღის მომიჯნავე ოკუპირებულ ტერიტორიებს. ასევე ფორმალურად რუსეთს არ „გადაუგდია“ სომხეთი და ფორმალურად არ დაურღვევია ხელშეკრულება. სამწუხაროდ, რუსეთს აქვს შეთანხმება მის მიერ აღიარებულ აფხაზეთთან და „სამხრეთ ოსეთთან“. ასე მარტივად პარალელის გავლება არ იქნება, მაგრამ ეს პრეცედენტი მოხდა და ეს პრეცედენტი იქნებ გამოფხიზლებად იქცეს ჩვენი აფხაზი და ოსი თანამოქალაქეებისთვის, იმიტომ, რომ ისინი დაინახავენ, მუდმივი არაფერი არ არის და როცა შენ, უსამართლო ომით ტერიტორიას მიიტაცებ და განახორციელებ ეთნიკურ წმენდას, ესე მარტივად ეს არ ჩაივლის“, - განაცხადა შარაშენიძემ.

გარდა ამისა, ექსპერტი ვარაუდობს, რომ სომხეთში მიმდინარე პროცესები ნიკოლ ფაშინიანის დამხობით და მისი, მოსკოვზე უფრო მეტად ორიენტირებული ძალების ჩანაცვლებით დასრულდება.

„მე დარწმუნებული ვარ, რომ ამ კონფლიქტის განმავლობაში მოსკოვსა და ბაქოს შორის კონტაქტი სულ იყო, თუმცა ამავე დროს, ჩემი აზრით, მოსკოვი არ ელოდა აზერბაიჯანისგან ასეთ სწრაფ და დიდ წარმატებას. არ ელოდა მოსკოვი, რომ გამოჩნდებოდა ამდენი დრონი და ეს დრონები გაანადგურებდა ძირითადად რუსულ ტექნიკას, რომელიც იყო სომხეთის და ყარაბაღის შეიარაღებულ ძალებში. კაპიტულაცია მოხდა ნამდვილად, ეს ჯერ სომხეთში წესიერად გადააზრებული შეიძლება არ აქვთ, იქ არიან ახლა შოკში. ეს ყველა ვარიანტში დასრულდება ფაშინიანის დამხობით და ალბათ, ამ ეტაპზე ფაშინიანს შეცვლიან უფრო მეტად მოსკოვზე ორიენტირებულ ძალები“, - აღნიშნა ექსპერტმა.

ცნობისთვის, სომხეთის პრემიერ - მინისტრის ნიკოლ ფაშინიანის განცხადებით, რუსეთისა და აზერბაიჯანის პრეზიდენტებთან ვლადიმერ პუტინთან და ილჰამ ალიევთან ერთად ხელი მოაწერა შეთანხმებას მთიან ყარაბაღში საბრძოლო მოქმედებების შეწყვეტის შესახებ, რომლის მიხედვითაც აზერბაიჯანს აღდამის რაიონი 20 ნოემბრისთვის, ქალბაჯარი - 15 ნოემბრისთვის, ლაჩინი კი 1-ელი დეკემბრისთვის უნდა დაუბრუნდეს.

იხილეთ ვიდეო: აზერბაიჯანისთვის ტერიტორიების დაბრუნების პრეცედენტი, იქნებ გამოფხიზლებად იქცეს ჩვენი აფხაზი და ოსი თანამოქალაქეებისთვის

ალექსანდრე თვალჭრელიძე - ფრიდმანის წინააღმდეგ სანქციების დაწესებამ იდეალური შესაძლებლობა შექმნა კომპანიის გაკოტრების და იქ სახელმწიფო მმართველის იმპერატიული დანიშვნისთვის, ამას კი „ბორჯომის“ ნაციონალიზაცია უნდა მოჰყვეს
ქართული პრესის მიმოხილვა 23.05.2022
ჰუბერტ ქნირში - გზა ევროკავშირში გაწევრიანებისკენ ჯერ კიდევ გრძელია - ის, რაც რამდენიმე კვირაში ევროპის საბჭომ შეიძლება გადაწყვიტოს, არის გზის დასაწყისი, არის გადაწყვეტილება, რომ ჩვენ ერთად გვინდა ამ გზის გავლა
„მაკდონალდს საქართველო“ Mc Happy Day-ის საქველმოქმედო კამპანიას იწყებს