ამ თვის ბოლომდე საწოლფონდი 8 500-მდე უნდა ავიდეს - თუ ეს საკმარისი არ იქნა, არსებობს გეგმა “ბ“, რომელიც დიდი სივრცეების მობილიზებას გულისხმობს, - ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განაცხადა.

როგორც გამყრელიძემ განმარტა, ე.წ. საველე ჰოსპიტლების იდეა განიხილება და მუშავდება, მაგრამ ამ ეტაპზე არასაველე საწოლების მობილიზება ხდება.

“დღეს საკოორდინაციო საბჭოს სხდომაზე ჯანდაცვის მინისტრმა განაცხადა, რომ მობილიზირებულია დაახლობით 5 500-მდე საწოლი. დღევანდელი რიცხვით საავადმყოფოებში 4 751 პაციენტი წევს და ყოველდღიულად ხდება საწოლფონდის მობილიზება, რომელიც ამ თვის ბოლომდე 8 500-მდე უნდა ავიდეს. თუ 8 500 საკმარისი არ იქნა, მაშინ არის გეგმა “ბ“, რომელიც დიდი სხვა სივრცეების მობილიზებას გულისხმობს, მათ შორის დავარქმევთ ამას საველე ჰოსპიტალს თუ დიდ სივრცეებს, სადაც შეიძლება დამატებითი ადგილები იყოს გამონახული, რათა პაციენტებს ჰოსპიტალური დახმარება მიეწოდოთ“, - განაცხადა ამირან გამყრელიძემ.