გიგი უგულავა - აშშ- ში საქართველოს ელჩს ვერ გაურკვევია, ქვეყნის ელჩია თუ „ქართული ოცნების“

„ევროპული საქართველოს“ ერთ-ერთი ლიდერის, გიგი უგულავას განცხადებით, აშშ- ში საქართველოს ელჩს დავით ბაქრაძეს „ვერ გაურკვევია ქვეყნის ელჩია, თუ „ქართული ოცნების“ ელჩი“.

როგორც მან ჟურნალისტებს განუცხადა, სასაცილოა ელჩის განცხადება იმის შესახებ, რომ აშშ-ის სახელმწიფო მდივნის მოადგილესთან, ფილიპ რიკერი ოპოზიციას იმიტომ შეხვდა, რომ თვითმფრინავზე დააგვიანა.

„ელჩი ბაქრაძის განცხადება სასაცილოა, რიკელი იმიტომ შეხვდა ოპოზიციას, რომ ან თვითმფრინავზე დააგვიანდა ან ვერ წავიდა. ასეთი ინტერპრეტაცია სასაცილოზე სასაცილოა, ამას საუბრობს ელჩი, ყველაზე ცუდი ესაა, რომელსაც ვერ გაურკვევია ქვეყნის ელჩია, თუ „ქართული ოცნების“ ელჩი“,-აღნიშნა უგულავამ.

ცნობისთვის, შეკითხვაზე, თუ რატომ გახდა აუცილებელი აშშ- ის სახელმწიფო მდივნის თანაშემწის თბილისში დარჩენა მას შემდეგ, რაც თავად მაიკ პომპეომ ქვეყანა დატოვა, აშშ- ში საქართველოს ელჩმა დავით ბაქრაძემ განაცხადა, რომ თავიდანვე განსაზღვრული იყო, თუ რამდენი ხნით რჩებოდა ფილიპ რიპერი საქართველოში.

„ის ახლდა სახელმწიფო მდივანს ევროპასა და ევრაზიაში, შემდგომ როცა ვიზიტი გაგრძელდა ახლო აღმოსავლეთში, ის უბრალოდ დარჩა და აქედან გაბრუნდა ვაშინგტონში. ამიტომ, ეს იყო განსაზღვრული, რომ ამ პერიოდით რჩებოდა”,- განაცხადა ბაქრაძემ.