ბათუმში, ერთ-ერთ კოვიდსასტუმროში, სადაც პაციენტი ექთანს თავს დაესხა, აცხადებენ, რომ ინციდენტის დროს პაციენტი მე-11 სართულიდან გადახტომას ცდილობდა.

სასტუმროს ადმინისტრაციის ინფორმაციით, პაციენტი მეტადონის პროგრამაში იმყოფებოდა.

იგი კოვიდსასტუმროდან სამართალდამცავებმა კლინიკაში გადაიყვანეს.

„კოვიდსასტუმროში პაციენტის შემოყვანისას ჯანდაცვის პერსონალი შესაბამის ისტორიას ავსებს. თავდასხმის მიზეზი არ ვიცით. პაციენტს გარკვეული ფსიქოლოგიური პრობლემა ჰქონდა, ჩართული იყო ფსიქოლოგი.

დღეს ამ პაციენტს სასტუმროდან გასვლა უწევდა, იგი მეტადონის პროგრამაში იყო ჩართული. ჩვეულებრივ კოვიდ დადასტურებიდან 10 დღე იმყოფებოდა, აქამდე აგრესია არ ჰქონია.

დაცვის თანამშრომლებმა დროული რეაგირება მოახდინეს. რადგან მე-11 სართულიდან გადმოხტომას აპირებდა, უსაფრთხოების მიზნით ბატუტი გავშალეთ“, - აცხადებს სასტუმროს დირექტორი დიანა ბერიძე.

ამავე კოვიდსასტუმროს ექიმი ეთერ აროშიძე ამბობს, რომ კოლეგას პაციენტმა ინციდენტის დროს დაზიანება ხელის არეში მიაყენა.

„უმნიშვნელო ნაკაწრი აქვს მიღებული, იმ დროს აქ არ ვყოფილვარ. პაციენტი მედატონის პროგრამაზე იყო. პაციენტს მეტადონის მიღება თუ დაუგვიანდებოდა, ჩვეულებრივად ითხოვდა. მეტადონი ერთი და იგივე დროს ეძლევა, ღამის საათებში არ იყო გათვალისწინინებული. პაციენტს სხვა დროს აგრესია არ გამოუხატავს“, - განაცხადა ექიმმა.