თურქეთის ხელისუფლებამ ფეთჰულაჰ გიულენთან კავშირში ეჭვმიტანილი კიდევ 82 სამხედრო პირის დაკავების განკარგულება გასცა, - ამის შესახებ ინფორმაციას თურქული მედია ავრცელებს.

მათივე ინფორმაციით, თურქმა სამართალდამცავებმა ოპერაცია დღეს ქვეყნის 39 პროვინციაში ჩაატარეს, რის შედეგადაც ჯერჯერობით 63 პირია დაკავებული.

აღნიშნული 82 ეჭვმიტანილიდან 70 მოქმედი სამხედრო მოსამსახურეა.

შეგახსენებთ, რომ 2016 წლის 15 ივლისს თურქეთის შეიარაღებული ძალების სამხედროების ჯგუფი შეეცადა სამხედრო გადატრიალება მოეწყო. შეტაკებები ძირითადად სტამბოლში და ანკარაში მოხდა, რის შედეგადაც 250 ადამიანი დაიღუპა. ოფიციალური ანკარა აღნიშნულში ფეთჰულა გიულენს ადანაშაულებს, თუმცა ის 2016 წლის მოვლენებში მონაწილეობას უარყოფს. თურქეთში 2016 წლიდან დღემდე ფეთჰულაჰ გიულენთან კავშირის ბრალდებით 80 000-მდე ადამიანი დააკავეს, 150 000-ზე მეტი კი სამსახურებიდან გაათავისუფლეს.