აკაკი კობალაძე - ჩემი და აკაკი ხუსკივაძის დაჭერა „გამოცხადებული მკვლელობის ქრონიკების“ მსგავსი იყო
შემიძლია გითხრათ, რომ გაკვირვებული ვარ, - ამის შესახებ ისნის საოლქო საარჩევნო კომისიის თავმჯდომარის, თეოდორე გობეჯიშვილის გარდაცვალების ფაქტთან დაკავშირებით დაკავებულმა აკაკი კობალაძემ სასამართლოს სხდომათა დარბაზიდან გათავისუფლების შემდეგ განაცხადა.
როგორც ტელეკომპანია „პირველის“ ეთერში კობალაძემ აღნიშნა, ის გათავისუფლებას არ ელოდა.
„შემიძლია გითხრათ, რომ გაკვირვებული ვარ, საერთოდ, დილას სხდომა ჩვენი თანხმობის გარეშე „ზუმის“ პროგრამით და ვიდეოთვალით უნდა ჩატარებულიყო, ადვოკატების დიდი შრომით, სხვათა შორის, ციხის ადმინისტრაციაც ჩაერთო, და უთხრა, სხვანაირად თუ გნებავთ, პროცესები დარბაზში უნდა გადასულიყო. გაოგნებული ვარ, ერთი პროცენტით არ დამიშვია, ჩემი და აკაკი ხუსკივაძის დაჭერა მარკესის „გამოცხადებული მკვლელობის ქრონიკების“ მსგავსი იყო, ჯერ ხდებოდა პოლიტიკოსების მიერ დაანონსება, თუ რა უნდა მომხდარიყო და შემდეგ ასრულებდნენ სამართალდამცავები.
ჩვენს გულშემატკივრებს დიდ მადლობას გადავუხდი. პრესის, ჩემი ადვოკატების და ჩემი მეგობრების, რომლებიც ამ ყველაფერს ასაჯაროებდნენ, მოხდა ჩვენი გარეთ გამოსვლა“, - განაცხადა კობალაძემ.
ცნობისთვის, ისნის საოლქო საარჩევნო კომისიის თავმჯდომარის, თეოდორე გობეჯიშვილის გარდაცვალების ფაქტთან დაკავშირებით დაკავებულები აკაკი კობალაძე და აკაკი ხუსკივაძე გაათავისუფლეს.
