აჭარის უმაღლეს საბჭოში პლენარული სხდომა აქციის ფონზე დაიწყო. სხდომის დასაწყისში "ქართული ოცნების" დეპუტატებმა აქციის მონაწილეების განცხადებებსა და ოპოზიციის მიერ მანდატებზე უარის თქმასთან დაკავშირებით განმარტებები გააკეთეს.

"ქართული ოცნების" წევრის ტიტე აროშიძის თქმით, დეპუტატ ირაკლი ჩავლეიშვილს ოპოზიციის წევრები აგრესიულად და უზნეოდ დაესხნენ თავს, რადგან ირაკლი ჩავლეიშვილმა უმაღლეს საბჭოში შესვლასთან დაკავშირებით სწორი გადაწყვეტილება მიიღო.

"ირაკლი ჩავლეიშვილს უზნეოდ დაუპირისპირდნენ თანაგუნდელები, მის მიმართ ერთგვარ ბულინგს აქვს ადგილი, ჩემის მხრიდან კი ვიტყვი, რომ მისასალმებელია მისი გადაწყვეტილება და სრულ მხარდაჭერას ვუცხადებთ. გაცამტვერდა მითი, რომ ოპოზიციის ერთიანობა ურყევია. ირაკლი ჩავლეიშვილი განათლებისა და კულტურის კომიტეტში იმუშავებს, ვულოცავ მას სრულფასოვან წევრობას და ასევე მივესალმებით ყველა დეპუტატს, რომელიც უმაღლეს საბჭოში შემოსვლას გადაწყვეტს", -განაცხადა ტიტე აროშიძემ.

ცნობისთვის, აჭარის უმაღლესი საბჭოში ოპოზიციის წევრებმა მანდატზე უარი განაცხადეს, შესვლაზე თანხმობა მხოლოდ რესპუბლიკური პარტიის უკვე ყოფილმა წევრმა ირაკლი ჩავლეიშვილმა განაცხადა.