საგარეო საქმეთა მინისტრმა დავით ზალკალიანმა იაპონიის ახლადდანიშნულ ელჩთან საქართველოში, აკირა იმამურასთან შეხვედრა გამართა.
როგორც “ინტერპრესნიუსს“ საგარეო საქმეთა სამინისტროდან აცნობეს, ელჩმა საგარეო საქმეთა მინისტრს რწმუნებათა სიგელების ასლები გადასცა.
„მინისტრი მიესალმა იაპონიის ელჩის თანამდებობაზე აკირა იმამურას დანიშვნას და წარმატებები უსურვა მას დიპლომატიურ საქმიანობაში. საუბრისას მხარეებმა ყურადღება გაამახვილეს ორ ქვეყანას შორის სხვადასხვა მიმართულებით არსებულ და სამომავლო თანამშრომლობაზე. განიხილეს ორ ქვეყანას შორის დღის წესრიგში არსებული საკითხების ფართო სპექტრი, მათ შორის, ეკონომიკური, კულტურული და ჰუმანიტარული მიმართულებით. ხაზი გაესვა ორმხრივ და მრავალმხრივ ფორმატებში ურთიერთობების ბოლოდროინდელ პოზიტიურ დინამიკას, მხარეებს შორის უმაღლესი და მაღალი დონის ვიზიტების გაცვლის მნიშვნელობას. მინისტრმა კიდევ ერთხელ გამოხატა მადლიერება იაპონიის მთავრობის მიმართ, პანდემიის დროს საქართველოსთვის გაწეული ფინანსური და ჰუმანიტარული დახმარებისთვის და ელჩს მიაწოდა ინფორმაცია საქართველოში და მის სამეზობლოში არსებულ ვითარებაზე, ასევე იმ ქმედებებზე, რომელსაც საქართველოს მთავრობა კორონავირუსის წინააღმდეგ ატარებს ბრძოლის მზადყოფნის თვალსაზრისით. თავის მხრივ, აკირა იმამურამ მადლობა გადაუხადა მინისტრს გულთბილი დახვედრისთვის და გამოთქვა იმედი, რომ პირად წვლილს შეიტანს ორი ქვეყნის ურთიერთობების გაღრმავების საკითხში”, - ნათქვამია ინფორმაციაში.