დავით თვალაბეიშვილი - ადგილობრივი რესურსების ათვისება და გამოყენება ქვეყნის ენერგოდამოუკიდებლობის წინაპირობაა

საქართველოს ეკონომიკისა და მდგრადი განვითარების სამინისტროსა და აზიისა და წყნარი ოკეანეთის გაეროს ეკონომიკური და სოციალური კომისიის (UNESCAP) ორგანიზებით, ონლაინ ფორმატში მაღალი დონის პოლიტიკის დიალოგი და ,,საქართველოს მდგრადი განვითარების მე-7 მიზნის საგზაო რუკის“ ოფიციალური პრეზენტაცია გაიმართა. ამის შესახებ „ინტერპრესნიუსს“ ეკონომიკისა და მდგრადი განვითარების სამინისტროდან აცნობეს.

აზიისა და წყნარი ოკეანეთის გაეროს ეკონომიკური და სოციალური კომისიის მიერ შემუშავებული „საგზაო რუკა საქართველოსთვის“ ენერგოსექტორის დაგეგმვის ინსტრუმენტს წარმოადგენს, რომლის დახმარებითაც საქართველო მდგრადი განვითარების მე-7 მიზნის მისაღწევად სწორი პოლიტიკის შემუშავებას შეძლებს. მდგრადი განვითარების მიზნები მოიცავს: თანამედროვე, საიმედო ენერგოსერვისებზე წვდომას, ერთიან გლობალურ ენერგეტიკულ მიქსში განახლებადი ენერგიის წილის მნიშვნელოვან ზრდას და ენერგოეფექტურობის გაუმჯობესებას გლობალური მასშტაბით.

შეხვედრა მისასალმებელი სიტყვით ეკონომიკისა და მდგრადი განვითარების მინისტრის მოადგილემ დავით თვალაბეიშვილმა გახსნა. მან ხაზი გაუსვა „საქართველოსთვის მდგრადი განვითარების მე-7 მიზნის საგზაო რუკის“ სტრატეგიულ მნიშვნელობას და მადლიერება გამოხატა დოკუმენტის შექმნის პროცესში მონაწილე მხარეებისადმი შეტანილი წვლილისთვის.

მინისტრის მოადგილის განცხადებით, მდგრადი განვითრების მიზნების შესასრულებლად ენერგეტიკის სფეროში მნიშვნელოვანია განახლებადი ენერგიების, ენერგოეფექტურობის, ენერგეტიკული უსაფრთხოების და სხვა მნიშვნელოვანი ენერგეტიკული მიმართულების გაძლიერება.

„ადგილობრივი რესურსების ათვისება და გამოყენება ქვეყნის ენერგოდამოუკიდებლობის წინაპირობაა. აღნიშნული ხელს შეუწყობს იმპორტირებულ რესურსებზე დამოკიდებულების შემცირებას და მაქსიმალურად გაზრდის განახლებადი ენერგიების წილს მთლიან ენერგეტიკულ ბალანსში, რაც თავის მხრივ ევროკავშირის ვალდებულებების შესრულებასაც მოახდენს“, - განაცხადა დავით თვალაბეიშვილმა.

შეხვედრაში ასევე მონაწილეობდნენ აზიისა და წყნარი ოკეანეთის გაეროს ეკონომიკური და სოციალური კომისიის (UNESCAP) აღმასრულებელი მდივნის მოადგილე ქავეჰ ზაჰედი, სტატისტიკის ეროვნული სამსახურის აღმასრულებელი დირექტორი გოგიტა თოდრაძე, ენერგეტიკისა და წყალმომარაგების მარეგულირებელი ეროვნული კომისიის წევრი მაია მელიქიძე და სხვა.

ცნობისთვის, საქართველო აზიისა და წყნარი ოკეანეთის გაეროს ეკონომიკური და სოციალური კომისიის (UN ESCAP) სრულუფლებიანი წევრია 2000 წლის 25 ივლისიდან.

ლილია შევცოვა - თუ აშშ საქართველოდან არ გასულა, ამერიკელები საქართველოში დაუპირისპირდებიან რუსულ გავლენებს, რომლებიც რამდენადაც ვიცი, ქვეყანაში საკმაოდ მრავლადაა
ქართული პრესის მიმოხილვა 22.01.2021
არჩილ მორჩილაძე - ბიუჯეტის ხარჯზე მედიკამენტების ხარჯების ანაზღაურებას სახელმწიფოს მიერ დასაქმებული ადამიანები და მათი ოჯახის წევრები, 250 000-ზე მეტი ადამიანი იღებს, როცა უამრავი სოციალურად დაუცველი ამ დაფარვის მიღმაა დარჩენილი
რა გეგმები აქვს ქუთაისის საერთაშორისო უნივერსიტეტს და რა პროგრამებს სთავაზობს სტუდენტებს? - ინტერვიუ უნივერსიტეტის კანცლერ მაგდა მაღრაძესთან
სილქფესტი მომხმარებლებს უქმეებზე ულიმიტო ინტერნეტ და უსასრულო სასაუბრო პაკეტების გააქტიურებას სთავაზობს
დეველოპერული კომპანია „ბლოქსი“ ქალაქ ზუგდიდში მულტიფუნქციური სავაჭრო ცენტრის მშენებლობას იწყებს
ევროკავშირის და FAO-ს მხარდაჭერით ქართველი ფერმერები შემოსავლებს და წარმოებას ზრდიან