ამბროლაურის საბავშვო ბაღების აღსაზრდელებს სასურსათე პაკეტები დაურიგდათ. ამის შესახებ ინფორმაციას ამბროლაურის მერია ავრცელებს. მათივე ინფორმაციით, ბავშვებს მათთვის გათვალისწინებულ პროდუქტთან ერთად საახალწლო საჩუქრებიც გადაეცათ.

აღსაზრდელთა ოჯახებზე სასურსათე პაკეტების გაცემის პროცესი ,,ამბროლაურის სკოლამდელმა დაწესებულებამ" უზრუნველყო.

„პროდუქტი, რომელიც მიმდინარე პერიოდში ბავშვთა კვებისთვის იყო გათვალისწინებული, 310 ოჯახს დაურიგდა. პროცესი მომავალშიც გაგრძელდება. ჩვენთვის თითოეულ აღსაზრდელზე ზრუნვა უმნიშვნელოვანესია“, - აღნიშნა მუნიციპალიტეტის მერმა ზვიად მხეიძემ.

კორონავირუსის პანდემიის გამო, სააღმზრდელო პროცესი ამბროლაურის მუნიციპალიტეტის საბავშვო ბაღებში შეჩერებულია. სასურსათე პაკეტების დარიგების პროცესში სახელმწიფო რწმუნებულის მოვალეობის შემსრულებელი გიორგი მაქარაშვილი, ამბროლაურის მუნიციპალიტეტის მერი ზვიად მხეიძე და საკრებულოს თავმჯდომარე ასლან საგანელიძე, ამბროლაურის სკოლამდელი დაწესებულების თანამშრომლებთან ერთად ჩაერთნენ.