საქართველოს პარლამენტის ადამიანის უფლებათა კომიტეტის თავმჯდომარე მიხეილ სარჯველაძე ელენე ხოშტარიას მიერ „ევროპული საქართველოს“ დატოვებაში „ქართული ოცნების“ მხრიდან ჩარევას გამორიცხავს. როგორც სარჯველაძემ ჟურნალისტებს განუცხადა, ოპოზიციაში „გარკვეული გადაჯგუფებები მოსალოდნელია“.
„გამოვრიცხავ, რომ ამ შემთხვევაში მიზეზი „ქართული ოცნების“ მხრიდან რომელიმე პოლიტიკური პარტიის ცხოვრებაში ჩარევა იყოს. რაც შეეხება იმას, რატომ იქნა გადაწყვეტილება კონკრეტული პოლიტიკოსის მხრიდან მიღებული, მე ამის კომენტირებას ვერ გავაკეთებ, ალბათ, თვითონ გვიამბობს. თუმცა, ზოგადად, მას შემდეგ, რაც აშკარად გამოიკვეთა დესტუქციული ნაწილი და შედარებით საღი აზრის და განზრახვის მქონე პოლიტიკური ჯგუფები, ასეთ დროს გარკვეული გადაჯგუფებები მოსალოდნელია“, - განაცხადა სარჯველაძემ.
შეგახსენებთ, რომ არსებული ინფორმაციით, ელენე ხოშტარია „ევროპულ საქართველოს“ ტოვებს.საკითხზე პარტიაში განცხადება დღის მეორე ნახევარში გაკეთდება. სად გააგრძელებს ხოშტარია პოლიტიკურ საქმიანობას, ამ ეტაპზე უცნობია.