სურსათის პაკეტები ყოფილ „ნარკოლოგიურის“ შენობაში მცხოვრებმა ოჯახებმა მიიღეს. აღნიშნულის შესახებ „ინტერპრესნიუსს“ გორის მერიიდან ცნობეს. როგორც მათ ინფორმაციაშია აღნიშნული, მოსახლეობის სურსათით უზრუნველყოფა შეზღუდვების მეორე ეტაპზეც გრძელდება.

„დაწესებული შეზღუდვების გამო უსახსროდ დარჩენილი და უკიდურესად გაჭირვებული მოსახლეობის პროდუქტებით მომარაგების მიზნით, ადგილობრივი ბიუჯეტიდან 100 ათასი ლარი გამოიყო.

აღნიშნული თანხით 50 ლარის ღირებულების სურსათის პაკეტებს გორის მუნიციპალიტეტში მცხოვრები 2 ათასი ოჯახი მიიღებს.

უწყებამ სხვადასხვა ორგანიზაციებისგანაც მიიღო შემოწირულობა. პროდუქტი გადაუნაწილდება იმ ოჯახებს, რომლებსაც ცხოვრება მძიმე სოციალურ პირობებში უწევთ.

გორის მერია დიდ მადლობას უხდის აღნიშნულ ორგანიზაციებს მხარდაჭერისთვის და ქველმოქმედებისთვის“, - ნათქვამია გორის მერიის მიერ გავრცელებულ ინფორმაციაში.