ამერიკელი პოლიტოლოგები, პოლიტიკოსები და ისტორიკოსებიც ყველაფერს გააკეთებენ იმისთვის, რომ ტრამპი ყველაზე უარეს პრეზიდენტთა რიცხვში მოაქციონ და ყველა მისი წარმატება წყალში გადაყარონ, - ამის შესახებ ამერიკანისტმა, თბილისის სახელმწიფო უნივერსიტეტის პროფესორმა ვასილ კაჭარავამ “პალიტრანიუსის” გადაცემა “ნიუსრუმში” , ვაშინგტონში განვითარებულ მოვლენებზე საუბრისას, განაცხადა.

ვასილ კაჭარავას თქმით, ტრამპს მომხრეებისთვის ძალადობისკენ არ მოუწოდებია და შესაძლოა, ტრამპს ეს ფაქტი არც აწყობდა.

“ისტორიას თუ გავიხსენებთ, კაპიტოლიუმზე თავდასხმა მოხდა 1812 წელს, ინგლისური ჯარის მიერ, ამერიკა-ინგლისის ომის დროს და გადაწვეს კიდევაც, მაგრამ თვითონ ამერიკის ისტორიაში ასეთი თავდასხმა ამ შენობაზე არ იყო. როგორც ახლა ტრამპის მოწინააღმდეგეები ამბობენ, ტრამპი მოუწოდებდა - იგი არ მოუწოდებდა შევარდნისაკენ, ბუნებრივია და პირიქით, შეიძლება უფრო აწყობდა კიდეც, რომ ეს შევარდნა არ მომხდარიყო, უბრალოდ მართლაც უამრავი ხალხი მივიდა 74 მილიონი ამერიკელი აღშფოთებულია ამ გაყალბებებით და აი ამ გაყალბების წინააღმდეგ ბრძოლა, მხილებანი - მისი სრული იგნორირება მოხდა სასამარლოების მხრივ და მასმედიის მხრივ. ტრამპს ძალადობისკენ არ მოუწოდებია, უბრალოდ ახლა გამარჯვებული მხარე ამას იყენებს”, - განაცხადა კაჭარავამ და დასძინა, რომ ამერიკელი პოლიტოლოგები, პოლიტიკოსები და ისტორიკოსებიც ყველაფერს გააკეთებენ იმისთვის, რომ ტრამპი ყველაზე უარეს პრეზიდენტთა რიცხვში მოაქციონ.

შეგახსენებთ, ოთხშაბათს, ვაშინგტონში დონალდ ტრამპის მხარდამჭერები კაპიტოლიუმის შენობაში შეიჭრნენ, სადაც კონგრესის ორივე პალატის გაერთიანებული სხდომა მიმდინარეობდა, რომელზეც საპრეზიდენტო არჩევნების შედეგების დადასტურების საკითხი განიხილებოდა. სამართალდამცავებმა წესრიგი რამდენიმე საათში აღადგინეს.