გიორგი შაქარაშვილის მკვლელობაში ბრალდებული 5 პირის სასამართლო პროცესი ბრალდების მხარის მტკიცებულებების გამოკვლევით გრძელდება
მცხეთის რაიონულ სასამართლოში ფეხბურთელ გიორგი შაქარაშვილის მკვლელობაში ბრალდებული 5 პირის სასამართლო პროცესი მიმდინარეობს. დღევანდელ სასამართლო სხომაზე ბრალდების მხარის მტკიცებულებების გამოკვლევა გაგრძელდება.
როგორც ბრალდებული არასრულწლოვნის ზ.ხ.-ს ადვოკატი, გიორგი გელხაური აცხადებს, მისთვის უცნობია ვის გამოკითხავს ბრალდების მხარე სასამართლო პროცესზე მოწმის სახით.
„პროცესი გაგრძელდება ბრალდების მხარის მტკიცებულებების გამოკვლევით. ჩვენთვის არ არის ცნობილი კონკრეტულად რომელ მოწმეს წარმოადგენს ბრალდების მხარე, თუმცა, ამას ნაკლებად აქვს მნიშვნელობა დაცვის მხარისთვის. არცერთი მტკიცებულება არ არის, ვერ წარმოადგენს ბრალდების მხარე, რომელიც დაადასტურებს არასრულწლოვანის და გარდაცვლილ შაქარაშვილის შემხებლობას",-აცხადებს გელხაური.
შეგახსენებთ, რომ ფეხბურთელ გიორგი შაქარაშვილის განზრახ ჯგუფურად მკვლელობას არჩილ გაგნიძეს, ნიკოლოზ რევაზიშვილს, ვახტანგ ჩიქოვანს, ზ.ხ-ს და ა.ქ.-ს ედავებიან.
