ქედის, შუახევისა და ხულოს მუნიციპალიტეტებში ყველა ძირითად მიმართულებაზე სტიქიის სალიკვიდაციო სამუშაოები დასრულებულია და საავტომობილო მიმოსვლა აღდგენილია. ამის შესახებ ინფორმაციას აჭარის ავტონომიური რესპუბლიკის მთავრობა ავრცელებს.

მათი ინფორმაციით, აჭარის საავტომობილო გზების დეპარტამენტის მიერ გაწმენდითი სამუშაოები ინტენსიურ რეჟიმში ხორციელდება.

„ხულოს მუნიციპალიტეტში დიდაჭარა-საციხური-გელაურის საავტომობილო გზის დაზიანებული სავალი ნაწილის აღდგენითი სამუშაოები აქტიურად მიმდინარეობს. ქედის მუნიციპალიტეტში დაზიანებული წონიარისის ხიდის შესწავლა საპროექტო სამსახურის მიერ უკვე განხორციელდა. მოსახლეობა ამ ეტაპზე შემოვლითი გზით სარგებლობს“,-აღნიშნულია ინფორმაციაში.