ბათუმის საქალაქო სასამართლომ მოძრაობა „ალტერნატივას“ აქტივისტს, ირაკლი ფანგანს აღკვეთის ღონისძიების სახით 2000-ლარიანი გირაო შეუფარდა. ბრალდებულს აღნიშნული თანხის გადასახდელად 40-დღიანი ვადა მიეცა, პარალელურად კი ირაკლი ფანგანი კვირაში ერთხელ გამომძიებელთან უნდა გამოცხადდეს.

ამასთან, მოსამართლე ვიოლეტა ფორჩხიძის გადაწყვეტილებით, ირაკლი ფანგანს დეპუტატ ირაკლი ჩავლეიშვილთან საქმის საბოლოო განხილვამდე მიახლოება ეკრძალება.

„თქვენ ხართ იმისთვის, რომ გამოხატოთ თქვენი აზრი, მაგრამ შეიძლება პიროვნებას არ ჰქონდეს გათვითცნობიერებული, რა ფარგლებში უნდა განხორციელდეს შესაბამისი ქმედება. თქვენი გამოხატვის თავისუფლება იზღუდება იქ, სადაც იწყება სხვისი თავისუფლების შეზღუდვა... თქვენივე უსაფრთხოებისთვის, რომ დაცული იყოთ ბრალის დამძიმებისგან თქვენივე ქმედებით, სასამართლომ მიიღო ეს გადაწყვეტილება”, - განუცხადა ბრალდებულს მოსამართლე ვიოლეტა ფორჩხიძემ.

წინა სასამართლო სხდომა 16 თებერვალს გაიმართება.

„არ ვნანობ არაფერს. ბრძოლას გავაგრძელებ ისევ, ძველებურად ვიაქტიურებ, აქციებშიც მივიღებ მონაწილეობას და ვიბრძოლებ ბოლომდე. პოზიცია არ შემიცვლია, ჩემი პოზიცია არის იგივე. მაგრამ, ვთქვი რომ მე თუ არა, სხვა გააკეთებს ანალოგიურს. სასამართლოს გადაწყვეტილებას ვეთანხმები“, - განაცხადა სასამართლო პროცესის შემდეგ ირაკლი ფანგანმა, რომელმაც ორი დღის წინ აჭარის უმაღლესი საბჭოს დეპუტატს ირაკლი ჩავლეიშვილს ნაგავი დააყარა.