„ევროპული საქართველოს“ წევრი, აკაკი ბობოხიძე, პარლამენტის მიერ მანდატების შეჩერების პროცესს ეხმაურება.

ბობოხიძის თქმით, ბოლო დღეებში განვითარებული მოვლენები იმის ფიქრის საშუალებას აძლევს, რომ „ქართული ოცნება“ საბაბს ეძებს იმისთვის, რომ არ დააკმაყოფილოს დეპუტატების განცხადება, რაც იქნება ავტორიტარიზმისა და თვითნებობის გამოხატულება.

როგორც ბობოხიძემ აღნიშნა, ხელისუფლებისგან, რომელმაც მიიტაცა ძალაუფლება, არ არის გასაკვირი, რომ მიიტაცოს კონკრეტული ადამიანების ნება და არ მოუხსნას უფლებამოსილება დეპუტატებს.

„ბოლო დღეებში განვითარებული პროცესები მაფიქრებინებს, რომ „ქართული ოცნება“ ეძებს საბაბს იმისთვის, რომ არ დააკმაყოფილოს დეპუტატების განცხადება, რაც იქნება კანონის ხელახალი დარღვევა და მინდა გითხრათ, რომ მოვა დრო, როდესაც ჩვენ მიერ ესეც იქნება „ქართული ოცნების“ წინააღმდეგ გამოყენებული, იმიტომ, რომ აიძულო ადამიანები იმუშაონ საკუთარი ნების გარეშე იქ, სადაც არ უნდათ, ესეც არის ავტორიტარიზმის, დიქტატურისა და თვითნებობის გამოხატულება.

ასე, რომ ხელისუფლებისაგან, რომელმაც მიიტაცა ძალაუფლება, ველოდები, რომ ასევე მიიტაცებს კონკრეტული პიროვნებების ნებას და არ მოუხსნის უფლებამოსილებას.

მე მოვუწოდებ „ქართულ ოცნებას“, დაფიქრდნენ, იმოქმედონ კანონის შესაბამისად და შეუწყვიტონ უფლებამოსილება იმ დეპუტატებს, რომლებმაც ამის თაობაზე განცხადება უკვე დაწერეს”, - განაცხადა ბობოხიძემ.