ქუთაისის მერი იოსებ ხახალეიშვილი საფიჩხიის ადმინისტრაციულ ერთეულში მიმდინარე ინფრასტრუქტურულ სამუშაოებს გაეცნო. ამის შესახებ ინფორმაციას ქუთაისის მერია ავრცელებს.
მათივე ცნობით, მოსახლეობის მოთხოვნებისა და ინტერესების გათვალისწინებით, ამ უბანში ერთდროულად რამდენიმე ინფრასტრუქტურულ პროექტზე მუშაობაა დაწყებული.
უფრო კონკრეტულად, რიონჰესის ქუჩაზე, #11-ის მიმდებარედ, საყრდენი კედელი ეწყობა, სადაც სამუშაოების დასრულების შემდეგ, ძელსკამებიც დაიდგმება.
თომაშვილის ქუჩაზე საბავშვო ატრაქციონებით, გამწვანებით, საპარკე სკამებით მოწყობილი სკვერი კეთდება.
სოლომონ მეორის ქუჩაზე, წყალწითელას დასახლების მიმდებარედ კი მარტივი ტიპის სპორტული მოედანი მოეწყობა.
"ვაგრძელებ ადმინისტრაციულ ერთეულებში გასვლას. საფიჩხიაზე, რამდენიმე ქუჩაზე ვიყავით. ამ უბანში სამ ინფრასტრუქტურულ პროექტზე მიდის ახლა მუშაობა. კეთდება საყრდენი კედელი, ეწყობა სკვერი და სპორტული მოედანი. როდესაც ხდება პროექტების შერჩევა, უპირველესად მოსახლეობის ინტერესებს, მათ თხოვნებს ვითვალისწინებთ და სწორედ ასე შევარჩიეთ, ამ ეტაპზე რა უნდა გაკეთებულიყო საფიჩხიის ადმინისტრაციულ ერთეულში“- აცხადებს იოსებ ხახალეიშვილი.
ქალაქის მერი ტყიბულის ქუჩაზე მცხოვრებ ლანჩავების მრავალშვილიან ოჯახსაც ესტუმრა და მათ სასურსათო ნობათი გადასცა.