აბაშის მუნიციპალიტეტის 15 ადმინისტრაციულ ერთეულში ახლადაშენებული ამბულატორიების შენობების პირველადი ჯანდაცვის ექიმებისთვის გადაცემის პროცესი დაიწყო.

როგორც აბაშის მუნიციპალიტეტის მერიის მიერ გავრცელებულ ინფორმაციაშია ნათქვამი, აბაშის მუნიციპალიტეტის მერმა, ლევან მაკალათიამ ორშაბათს გამართულ თათბირზე შესაბამის სამსახურებს დაავალა უზრუნველყონ ახალი ამბულატორიების ექიმებისთვის გადაცემის პროცესის დაჩქარება.

"ადმინისტრაციულ ერთეულებში საექიმო ამბულატორიები ლევან მაკალათიამ მერიის ადმინისტრაციული სამსახურის უფროსთან, დიმიტრი ცანავასთან ერთად დაათვალიერა და არსებულ ვითარებას ადგილზე გაეცნო.

აბაშის მუნიციპალიტეტის მცხოვრებლები თანამედროვე სტანდარტების მქონე ამბულატორიით ისარგებლებენ. შენობები ტექნიკითა და შშმ პირთათვის განკუთვნილი შესაბამისი ინვენტარით აღიჭურვება, შესაძლებელი იქნება თანამედროვე მოთხოვნათა გათვალისწინებით განხორციელდეს მოსახლეობის სამედიცინო მომსახურება.

პროექტი აბაშის მუნიციპალიტეტში საქართველოს მთავრობის დადგენილებით, ჯანმრთელობისათვის უსაფრთხო გარემოს უზრუნველყოფის ხელშეწყობის მიზნით, საქართველოს რეგიონებში განსახორციელებელი პროექტების ფონდიდან ჯამში 1 000 000 ლარით დაფინანსდა", - ნათქვამია ინფორმაციაში.