პარლამენტის თავმჯდომარის არჩილ თალაკვაძის ინფორმაციით, პარლამენტი აღმასრულებელ ხელისუფლებასთან ერთად, ეროვნული უსაფრთხოების ახალ კონცეფციაზე მუშაობას გეგმავს, რომელშიც პრიორიტეტულ ადგილს ჰიბრიდული საფრთხეების, მათ შორის კიბერსაფრთხეების, ანტიდასავლური პროპაგანდისა და ინფორმაციული ოპერაციების საპასუხოდ ეროვნული შესაძლებლობებისა და საზოგადოების მედეგობის გაძლიერება დაიკავებს.
გარდა ამისა, როგორც თალაკვაძემ პარლამენტის პლენარულ სხდომაზე განაცხადა, დაგეგმილია ტოტალური თავდაცვის მექანიზმების გაძლიერება.
“საქართველოს პარლამენტი თავდაცვის კოდექსს მიიღებს, რომელიც მოაწესრიგებს სამხედრო სამსახურის გავლასთან დაკავშირებულ ურთიერთობებს, გააუმჯობესებს თავდაცვის ძალების მართვის ეფექტიანობას და მოახდენს თავდაცვის სფეროში მოქმედი სამართლებრივი აქტების კოდიფიცირებას“, - განაცხადა თალაკვაძემ პლენარულ სხდომაზე, სადაც მან ყოველწლიური ანგარიში წარადგინა.