ბათუმში, გმირთა ხეივანში ხმაური იყო. ერთმანეთს მოქალაქეები და სამართალდამცავები დაუპირისპირდნენ. დაკავებულია არასამთავრობო ორგანიზაცია "ალტერნატივას" ხელმძღვანელი ხათუნა ბერიძე და კიდევ რამდენიმე პირი. ისინი გმირთა ხეივანში მსვლელობას აწყობდნენ და ე.წ.“კომენდანტის საათის” დაწესებას აპროტესტებდნენ.
"ერთი წლის განმავლობაში, ბიძინა ივანიშვილს ხალხი ჩაკეტილი ჰყავს. ადამიანებს ლუკმა-პურის შოვნას უკრძალავენ. ადამიანები „კომენდანტის საათი“ გააპროტესტეს, ისინი პოლიციამ დაარბია და ცემა. დაკავებულია არაერთი მოქალაქე",- აცხადებს "ნაციონალური მოძრაობის" წევრი ელგუჯა ბაგრატიონი.
სამართალდამცავების განცხადებით, მოქალაქეებმა დაწესებული რეგულაციები დაარღვიეს.
„როდესაც სამართალდამცავები მოქალაქეების ვინაობას ამოწმებდნენ, მათ პოლიციელებს გაუწიეს წინააღმდეგობა. მათ დაარღვიეს „კომენდანტის საათი“ და სამართალდამცავებმა შესაბამისად იმოქმედეს ",- აცხადებს აჭარის პოლიციის დეპარტამენტის ხელმძღვანელის მოადგილე ირაკლი ჭედიშვილი.