ჩვენ გვინდა შევთავაზოთ სასამართლოს შალიკაშვილის გათავისუფლება გირაოს სანაცვლოდ, რომლის ოდენობაც 30 000 ლარს შეადგენს, - ამის შესახებ ჟურნალისტებს ფოთში მომხდარი მკვლელობის საქმეზე დაკავებული შალვა შალიკაშვილის ადვოკატმა ნუგზარ ტყებუჩავამ განუცხადა.
მისი თქმით, არის თუ არა სასამართლო დამოუკიდებელი, ეს მიღებული გადაწყვეტილებით გაირკვევა.
შალიკაშვილის აღკვეთის ღონისძიების შეფარდებაზე ზუგდიდის რაიონული სასამართლო დღეს 12:00 საათზე იმსჯელებს.
,,ჩვენ გვინდა შევთავაზოთ სასამართლოს შალიკაშვილის გათავისუფლება გირაოს სანაცვლოდ, რომლის ოდენობაც არის 30 000 ლარი. მოლოდინი გვაქვს ერთადერთი, სასამართლო იქნება თუ არა მოწოდების დონეზე, გათავისუფლებულია თუ არა იგი ძველი მენტალიტეტისაგან, იქნება თუ არა ის დამოუკიდებელი, სწორედ ამაზეა დამოკიდებული მისი გადაწყვეტილება. მე ვესაუბრე ჩემი დაცვის ქვეშ მყოფს, იგი ბრალს არ აღიარებს. ის ამბობს, რომ არანაირი შემხებლობა ამ საქმესთან მას არა აქვს. მკვლელობის დროს იმყოფებოდა ქალაქში, სტომატოლოგიურ კლინიკასთან, სადაც მეუღლე და და ჰყავდა წაყვანილი“, - განუცხადა ჟურნალისტებს ადვოკატმა ნუგზარ ტყებუჩავამ.
4 თებერვალს ფოთში, შსს-ს მომსახურების სააგენტოსთან საკუთარ ავტომობილში, შვილის თვალწინ ახალგაზრდა მამაკაცი, გურამ ახალაია ჩაცხრილეს. გავრცელებული ინფორმაციით, მკვლელობის მოტივი შურისძიებაა. მკვლელობის ფაქტზე შსს-მ შალვა შალიკაშვილი ცხელ კვალზე დააკავა. მას ბრალი სსკ-ის 108-ე მუხლით აქვს წარდგენილია, რაც განზრახ მკვლელობას გულისხმობს.