ბოლო რამდენიმე დღეა, სოციალურ ქსელში ბიზნესმენ დავით იაკობაშვილის ყალბი ინტერვიუები და სტატიები ვრცელდება. კერძოდ, გუშინ ვებგვერდ newsweekly.to-ზე გავრცელდა რამდენიმე მასალა, რომელშიც გამოყენებულია კონტექსტიდან ამოგლეჯილი ფრაგმენტები დავით იაკობაშვილის ინტერვიუდან, რომელიც მან ჟურნალ Forbes Georgia-ს მთავარ რედაქტორ გიორგი ისაკაძეს მისცა.

Forbes Georgia-ს რედაქცია აცხადებს, რომ newsweekly.to-ზე გამოქვეყნებულ სტატიაში „სპეცრეპორტაჟი: დავით იაკობაშვილის ბოლო ინვესტიციებმა აჟიოტაჟი გამოიწვია ექსპერტებსა და მსხვილ ბანკებს შორის“, გამოყენებულია კონტექსტიდან ამოგლეჯილი ფრაგმენტები ინტერვიუდან - "დღეს რუსეთში მთავარი ვექტორია სახელმწიფო კომპანიები", რომელიც forbes.ge-ის პორტალზე 2020 წლის მაისში გამოქვეყნდა.

„ფორბსის“ რედაქცია newsweekly.to-ზე გავრცელებული სტატიის შესახებ დავით იაკობაშვილთან ინფორმაციის გადამოწმების შემდეგ აცხადებს, რომ გავრცელებული ინტერვიუ არის ყალბი და არ შეესაბამება სინამდვილეს.

გარდა ამისა, ამავე საიტზე - newsweekly.to-ზე გავრცელდა ინტერვიუ, რომელიც თითქოს ბიზნესმენთან გადაცემა „პროფილის“ წამყვანმა მაია ასათიანმა ჩაწერა, რასაც ჟურნალისტი უარყოფს.

„მსგავსი ინტერვიუ არასდროს შემდგარა, თან „პროფილის“ სტუდიაში; არც ვიცნობ ბიზნესმენ დავით იაკობაშვილს და არც არასდროს შევხვედრილვარ მას“, - ამბობს მაია ასათიანი.

(R)