ბექა ოდიშარია დიეგო კოლასს შეხვდა
დიასპორისა და კავკასიის საკითხთა კომიტეტის თავმჯდომარე, ბექა ოდიშარია საფრანგეთის საგანგებო და სრულუფლებიან ელჩს, დიეგო კოლასს შეხვდა,- ამის შესახებ ინფორმაციას პარლამენტის პრესსამსახური ავრცელებს.
შეხვედრაზე მხარეებმა იმ ისტორიულ ნაწილზე ისაუბრეს, რომელიც ქართველ პოლიტიკურ ემიგრაციას და რუსეთის საბჭოთა ოკუპაციის შემდეგ საქართველოს ხელისუფლების წარმომადგენელთა პარიზსა და ლევილში ცხოვრებას უკავშირდება. აღინიშნა, რომ გასული საუკუნის 20-იანი წლებიდან საფრანგეთი ყოველთვის მხარს უჭერდა ანტი საბჭოთა მოძრაობას და ქართულ ემიგრაციას.
"შეხვედრაზე საუბრის ერთ-ერთ თემას საქართველოს საგარეო პოლიტიკური პრიორიტეტების განხილვა წარმოადგენდა. ბექა ოდიშარიამ ფრანგ დიპლომატს ევროკავშირთან და ევროატლანტიკურ ალიანსთან საქართველოს ინტეგრაციის მიზნით გატარებულ ღონისძიებებზე ინფორმაცია მიაწოდა და აღნიშნა, რომ ხელისუფლება მოწოდებულია 2024 წლისთვის ევროკავშირს გაწევრიანების განაცხადით მიმართოს.
კომიტეტის თავმჯდომარემ საფრანგეთის ელჩს, მისი ქვეყნის მხრიდან საქართველოს მიმართ განხორციელებული დახმარებისთვის მადლობა გადაუხადა და საელჩოსთან სამომავლო თანამშრომლობის მზაობა გამოთქვა", - აღნიშნულია ინფორმაციაში.
v-if="article.gallery" v-html="article.gallery"
