აბაშის მუნიციპალიტეტის ტერიტორიაზე, თბილისი-სენაკი ლესელიძის საავტომობილო გზაზე, მდ. ცხენისწყალზე არსებული საავტომობილო ხიდის სარეაბილიტაციო სამუშაოები აქტიურად მიმდინარეობს. ამის შესახებ ინფორმაციას აბაშის მუნიციპალიტეტის მერია ავრცელებს.

მათივე ინფორმაციით, სამუშაოებს აბაშის მუნიციპალიტეტის მერი, ლევან მაკალათია, მერიის ადმინისტრაციის სამსახურის უფროსთან ერთად გაეცნო.

,,პროექტს საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტი ახორციელებს. პროექტის ფარგლებში რეაბილიტაცია უტარდება ხიდის სავალ ნაწილს, მოაჯირებსა და ტროტუარებს. ასევე, იგეგმება დამცავი ბურჯების სარეგულაციო ნაგებობების გაკეთება და გზის საგზაო ნიშნებით აღჭურვა.

პროექტის დასრულების შემდეგ ხიდის მდგრადობა მნიშვნელოვნად გაიზრდება, გახდება უფრო უსაფრთხო, კომფორტული და ის პრობლემები, რაც გადაადგილების თვალსაზრისით ჰქონდათ მძღოლებს აღმოიფხვრება. პროექტის ღირებულება 860 000 ლარია. ხიდის სარეაბილიტაციო სამუშაოები მიმდინარე წლის მაისის ბოლოს დასრულდება“, - ნათქვამია ინფორმაციაში.