გიგი წერეთელი - პარტიის წარმატება და წარუმატებლობაც ყველა ლიდერის პასუხისმგებლობაა

პარტიის წარმატება და წარუმატებლობაც ყველა ლიდერის პასუხისმგებლობაა, - ამის შესახებ “ევროპული საქართველოს“ ერთ-ერთმა ლიდერმა გიგი წერეთელმა “პალიტრანიუსის“ გადაცემა “360 გრადუსში“ განაცხადა.

წერეთლის შეფასებით, თუკი პარტიას განახლება არ შეუძლია, ესე იგი მას არა აქვს პერსპექტივა, უფრო წონიანი სიტყვა თქვას პოლიტიკაში, “ევროპულ საქართველოს“ კი, თავისი რესურსით, პოლიტიკური წონით, ინტელექტით, ხედვითა და სტატეგიით დიდი და მნიშვნელოვანი როლის თამაშის შესაძლებლობა გააჩნია.

“არაფერი არაჩვეულებრივი და ექსტრაორდინალური არ უნდა იყოს იმაში, რომ არჩევნების შემდეგ ნებისმიერი პოლიტიკური პარტია რაღაცას აჯამებს, აანალიზებს და თუ ეს შედეგი იმგვარი არ არის, როგორიც მას უნდოდა, ფიქრობს, რა გააკეთოს სამომავლოდ. ნორმალურ ქვეყნებში პროგრესული სტანდარტია, როცა პარტიის ხელმძღვანელობა ამ პასუხისმგებლობას აღიარებს და გადაწყვეტილებას იღებს. უმეტეს შემთხვევაში, ეს გადაწყვეტილება იმდაგვარია, რომ პარტიის ხელმძღვანელობა იცვლება. პარტია თვლის, რომ საჭიროა ახალი სტრატეგია. იმის მიუხედავად, რომ საპარლამენტო არჩევნები ზეწოლისა და მანიპულირების პირობებში წარიმართა, “ევროპულ საქართველოს“ ჰქონდა სამჯერ მეტის მოლოდინი. ვთვლით, რომ იყო შიდა პარტიული პრობლემები კამპანიის წარმართვაში. ბუნებრივია ადამიანები, ვინც წინა პლანზე იყვნენ, თვლიან, რომ პასუხისმგებლობა უნდა აიღონ“, - განაცხადა გიგი წერეთელმა.

როგორც გიგი წერეთელმა აღნიშნა, ანალიზმა შესაძლოა აჩვენოს, რომ სადღაც პიროვნულმა ფაქტორმა არ იმუშავა, სადღაც რთული იყო ფინანსების ორგანიზება “ქართული ოცნების“ წნეხის პირობებში, ხოლო ზოგიერთი გზავნილი თუ სარეკლამო რგოლი არ იყო ეფექტური.

მისივე თქმით, პარტიის ლიდერთა დისტანცირება ხდება არა პარტიისაგან, არამედ პარტიის მართვისგან. წერეთელს მიაჩნია, რომ თუკი განახლებაზეა საუბარი, შესაძლებელია პარტიაში ახალი ლიდერები მივიდნენ, ვინც პარტიის მართვას განახორციელებენ.

რამაზ საყვარელიძე - თუ „ქოც/ნაცებმა“ მიაღწიეს საწადელს, ისევ დატოვეს ამომრჩეველი ორ პოლუსს შორის, მაშინ არაფერი შეიცვლება, ამ კინოსაც ის დასასრული ექნება, რაც ადრინდელ კინოებს ჰქონდათ
ქართული პრესის მიმოხილვა 23.09.2021
დიმიტრი შველიძე - ახლა პოლიტიკური ელიტა იდეებისაგან დაცლილია, ფულის ფაქტორი გადამწყვეტია, სოციალური პოლარიზაცია უძლეველია და კაცმა არ იცის, ელექტორატის უმრავლესობა ვის უჭერს მხარს
სტერეო +  განცხადებას ავრცელებს
„სს ფუდმარტი“ რიგით მე-500 მაღაზიას ხსნის
„ვითიბი“ ბანკმა ილუზიების მუზეუმის გასახსნელად 700,000 ლარის ოდენობის სესხი გასცა
ვლადიმერ პაპავა - საუბარი, რომ „ვისოლში“ საწვავი არ ჩავასხათ, კონკრეტულ ქსელში საკვები არ ვიყიდოთ, ბიზნესზე ტერორია
საქართველოს უნივერსიტეტი ვაქცინაციის პროცესში ჩაერთო
შპს „ლუკოილ-ჯორჯიამ“ კომპანია „უნიგრუპის“ წინააღმდეგ სასამართლოში სარჩელი შეიტანა