ქუთაისში აქტივისტებმა დაუმორჩილებლობა გამოაცხადეს და ქალაქში მსვლელობა მოაწყვეს. “კომენდანტის საათი” მათ ქუთაისის მერიასთან აქციაზე დაკავებული აქტივისტების გათავისუფლების მოთხოვნით დაარღვიეს და მსვლელობით "ქართული ოცნების" ოფისთან მივიდნენ.

აქტივისტები სკანდირებდნენ: "მონებო, ძირს კორუმპირებული ჩინოვნიკები".

მათი თქმით, თუ ხვალამდე დაკავებულები არ გაათავისუფლეს შიმშილობას დაიწყებენ.

ქუთაისის მერიასთან აქციის მონაწილეებსა და სამართალდამცველებს შორის მომხდარი დაპირისპირების დროს 6 პირი დააკავეს. როგორც "ინტერპრესნიუსს" შსს-ში განუცხადეს, ისინი ადმინისტრაციული წესით არიან დაკავებულები.

აქტივისტები მერთან შეხვედრას ითხოვდნენ და მერიაში შესვლას ცდილობდნენ, რასაც მათსა და სამართალდამცველებს შორის ფიზიკური დაპირისპირება მოჰყვა.