ქუთაისში გუშინ მომხდარი დაპირისპირების დროს დაკავებულები გაათავისუფლეს. დაკავებულებიდან ოთხს ჯარიმა შეეფარდა, ორის პროცესი გადაიდო. ჯარიმა 1500-დან 2000 ლარამდეა. დაკავებულების თქმით, ისინი პოლიტიკური ნიშნით დააკავეს, რადგან სამართალდამცველებმა მერის კრიტიკა ვერ აიტანეს.

ერთ-ერთი დაკავებულის თქმით, ის შეუძლოდ იყო, საავადმყოფოში გადაიყვანეს, თუმცა მიუხედვად ჯანმრთელობის მდგომარეობისა, დროებით დაკავების იზოლატორში დააბრუნეს. მათი თქმით, პროტესტი გაგრძელდება და ხელისუფლებას მომავალშიც ამხელენ.

ცნობისთვის, გუშინ ქუთაისის მერიასთან აქციის მონაწილეებსა და სამართალდამცველებს შორის მომხდარი დაპირისპირების დროს 6 პირი დააკავეს. აქტივისტები მერთან შეხვედრას ითხოვდნენ და მერიაში შესვლას ცდილობდნენ, რასაც მათსა და სამართალდამცველებს შორის ფიზიკური დაპირისპირება მოჰყვა.