თბილისის საქალაქო სასამართლომ გუშინ ღამით, "ქართული ოცნების“ ოფისთან მიმდინარე აქციაზე ადმინისტრაციული წესით დაკავებულ „მოძრაობა საქართველოსთვის“ წევრ კახაბერ კვეკვესკირს 1100 - ლარიანი, ხოლო დავით დიღმელაშვილი 1000 - ლარიანი ჯარიმა დააკისრა.
როგორც კახაბერ კვეკვესკირმა „ინტერპრესნიუსთან“ საუბრისას აღნიშნა, მისი მხრიდან აქციაზე ბილწსიტყვაობას ადგილი არ ჰქონია და აპირებს, რომ საქალაქო სასამართლოს გადაწყვეტილება სააპელაციო სასამართლოში გაასაჩივროს.
მისი თქმით, დაჯარიმდა იმისთვის, რომ თითქოს ქალაქის მერს სიტყვიერი შეურაცხყოფა მიაყენა, რასაც მისი მხრიდან ადგილი არ ჰქონია.
"პროცესი მიმდინარეობდა ძალიან არაადეკვატურად, ჩვენთვის არანაირი მტკიცებულებები არ წარუდგენიათ. მხოლოდ პოლიციელის სიტყვების გამო დამაჯარიმეს 1100 ლარით. რა თქმა უნდა, ჩემი მხრიდან ასეთ ბილწსიტყვაობას ადგილი არ ჰქონია, ამ მოგონილ ბრალდებაზე მოსამართლემ წამებში მიიღო გადაწყვეტილება და წავიდა. ვაპირებთ, რომ აღნიშნული გადაწყვეტილება გავასაჩივროთ“, - აღნიშნა კახაბერ კვეკვესკირმა.
ცნობისთვის, „მოძრაობა საქართველოსთვის“ წევრები კახაბერ კვეკვესკირი და დავით დიღმელაშვილი „ქართული ოცნების" ოფისთან ადმინისტრაციული სამართალდარღვევათა კოდექსის 166-ე (წვრილმანი ხულიგნობა) და 173-ე (სამართალდამცავი ორგანოს თანამშრომლის მოთხოვნისადმი დაუმორჩილებლობა) მუხლებით დააკავეს.