ბათუმში, ე.წ იაფი სახლის კორპუსში შეჭრილ მოქალაქეებთან მერიის მუნიციპალური ინსპექცია და აჭარის ჯანდაცვის მინისტრის მოადგილე რამაზ ჯინჭარაძე მოლაპარაკებებს აწარმოებენ. დიალოგის შედეგად, მოქალაქეთა ნაწილმა "იაფი სახლის" შენობა უკვე დატოვა.
როგორც ბათუმის მერიის მუნიციპალურ ინსპექციაში განაცხადეს, თითოეული ოჯახის მონაცემებს ჩაიწერენ და მოქალაქეთა პრობლემებს ინდივიდუალურად გაეცნობიან.
ცნობისთვის, ბათუმში ე.წ იაფი სახლის კორპუსებში სოციალურად დაუცველი მოქალაქეები შეიჭრნენ და ფართების გადაცემას ითხოვენ. როგორც ისინი აცხადებენ, ფინანსური პრობლემები შეექმნათ და საცხოვრებელში ქირის ფულს ვერ იხდიან. მათივე თქმით, წასასვლელი არსად აქვთ. ადგილზე სამართალდამცავები რჩებიან.