„გირჩის“ ერთ-ერთი ლიდერის ვახტანგ მეგელიშვილის განცხადებით, არჩევნების გაყალბების ნაწილში ოპოზიციამ დასავლელი პარტნიორები ვერ დაარწმუნა.

კითხვაზე, აქვს თუ არა ეჭვი, რომ შესაძლოა, არჩევნები არ გაყალბებულა, მეგრელიშვილი პასუხობს: „უკვე ყველაფრის ეჭვი მაქვს გამომდინარე იქიდან, რა მდგომარეობაშიც 3 თვეა ვიმყოფებით“.

როგორც მან ტელეკომპანია „პალიტრანიუსის“ გადაცემა „რეზიუმეში“ განაცხადა, არჩევნების გაყალბების მტკიცებულებები „ფიზიკურად არ აქვთ“.

„მოგვეცით მტკიცებულებები არჩევნების გაყალბების, რის გამოც არის ამხელა ამბავი ატეხილი და სინამდვილეში საჯარო სივრცეში ეს მტკიცებულებები ფიზიკურად არ გვაქვს. უკვე ყველაფრის ეჭვი მაქვს გამომდინარე იქიდან, რა მდგომარეობაშიც 3 თვე ვიმყოფებით. ცხადია, ვხედავთ, რომ გაყალბების ნაწილში ჩვენმა კოლეგებმა ჩვენი დასავლელი პარტნიორები ვერ დაარწმუნეს. კითხვა არ გიჩნდებათ, რატომ? ჩვენთვის მტკიცებულებები იყო პირადი ქეისები, მაგრამ არ ყოფილა მთელი ქვეყნის მასშტაბით გაანალიზებული, რა მასშტაბი ჰქონდა ამას“,- განაცხადა მეგრელიშვილმა.

ამასთან, მისი თქმით, ოპოზიციამ უნდა გადაწყვიტოს, რომელ მხარეს ირჩევს.

„ჩვენ არცერთ მხარეს არ ავირჩევთ. ოპოზიციას გადასაწყვეტი აქვს, სად ურჩევნია - შევიდეს „ქართულ ოცნებასთან“ პარლამენტში, თუ ჩვენთან ერთად დარჩეს ქუჩაში. ჩვენ ჩვენი გადაწყვეტილება მიღებული გვაქვს. ვიღებთ გადაწყვეტილებას, რომ მხარე არ ავირჩიოთ. პარლამენტში შესვლა, ნიშნავს „ქართული ოცნების“ მხარის არჩევას. ქუჩაში დარჩენა არ ნიშნავს არცერთი მხარის არჩევას“,- განაცხადა მეგრელიშვილმა.