კრემლის პრესსპიკერის, დიმიტრი პესკოვის განცხადებით, რუსეთი დასავლეთთან ურთიერთობის ურთულეს საკითხებთან დაკავშირებით გამოსავლის პოვნას დიალოგის გზით ცდილობს, ევროკავშირი და შეერთებული შტატები კი მანიაკალური დაჟინებით აგრძელებენ სანქციებზე საუბარს.

„სამწუხაროდ, ბრიუსელში, ისევე როგორც შეერთებულ შტატებში, სანქციებზე საუბარი მანიაკალური დაჟინებით გრძელდება. ეს არის ის, რაც საერთოდ არ მოგვწონს“, - განაცხადა პესკოვმა.

მისი თქმით, რუსეთი იმედოვნებს, რომ "დიალოგის გაგრძელების პოლიტიკური ნება უპირატესობას მოიპოვებს და დასავლეთთან ურთიერთობის ყველაზე რთული საკითხები მხოლოდ დიალოგის ფარგლებში გადაიჭრება.“

პესკოვის მტკიცებით, მოსკოვი დასავლეთის წინააღმდეგ საპასუხო ზომებს ყოველთვის საკუთარი ინტერესებიდან გამომდინარე ღებულობდა.

“ჩვენი პასუხი ყოველთვის კარგად განხილული და ჩვენს ინტერესებთან შეთანხმებული იყო“, - აღნიშნა კრემლის პრესსპიკერმა.