მელია ფიქრობს, რომ რაც მეტ შეურაცხმყოფელ სიტყვას იტყვის, მონა, მხევალი, თუ სხვა ასეთი ეპითეტებით დატვირთავს თავის კომენტარს, გაქრება ის რეალობა, რაც არსებობს - ფაქტია, როცა პოლიტიკურად გაუჭირდა "ნაცმოძრაობას," გადაწყვიტეს, რომ ნიკა მელიას თემა წამოწიონ,- ამის შესახებ პარლამენტის პირველმა ვიცე- სპიკერმა გია ვოლსკიმ ჟურნალისტებთან ნიკა მელიას განცხადების საპასუხოდ აღნიშნა.
ვოლსკი მიიჩნევს, რომ "ნაციონალურ მოძრაობას" სურს ნიკა მელიას თემის ირგვლივ აჟიოტაჟი შექმნას.
"რაც შეეხება გავრილოვს, არც მისი სავარძელში ჩახტომა, არც მისი მოულოდნელი და დღევანდელი განცხადებები და საერთოდ, მისი მოქმედებები არათუ ჩვენს გუნდს, არამედ სწორედაც რომ მის მხარეს აგდებს მაშველ რგოლს. ზუსტად ის კომენტარები გააკეთა, რაც სჭირდებოდათ ამ პოლიტიკური დემაგოგიის ავტორებს“, - განაცხადა ვოლსკიმ.
რაც შეეხება დღევანდელ გადაწყვეტილებას, ვოლსკის განცხადებით, პარლამენტი სასამართლო არ არის და შესაბამისად, ის არ იღებს გადაწყვეტილებას ნიკა მელიას ბრალეულობასთან დაკავშირებით.
"ციხისთვის არ გაუშვია "ქართულ ოცნებას" და პარლამენტს. პარლამენტმა უბრალოდ საშუალება მისცა სასამართლოს განიხილოს საკითხი. როგორ შეიძლება პარლამენტმა გადაწყვიტოს ეს საკითხი და არ იმსჯელოს იმაზე, რამდენი ასეული ადამიანია საქართველოში, რომელიც იგივე პირობებში იმყოფება და მაშინ, მოიძროს ყველამ ეს შემზღუდავი სამაჯური. არის კიდევ ერთი დამოკიდებულება ამ საკითხების მიმართ - სახელმწიფოს მართვის სისტემა როგორ წარმოუდგენიათ იმ ფანჩატურში შეკრებილ ადამიანებს და რეალურად რა არის? თუკი არ იღებ ასეთ გადაწყვეტილებას ნიშნავს იმას, რომ იმ აქტივობებს უჭერ მხარს, რასაც ჰქვია სახელმწიფოს დესტაბილიზაცია, დესტრუქცია“ , - განაცხადა ვოლსკიმ.