გოგიტა თოდრაძის ხელმძღვანელობით გაეროს ESCAP-ის სტატისტიკის კომიტეტის ბიუროს სხდომა ჩატარდა

დღეს, 17 თებერვალს, გაეროს აზიისა და წყნარი ოკეანის ეკონომიკური და სოციალური კომისიის (UNESCAP) სტატისტიკის კომიტეტის ბიუროს სხდომა ონლაინ რეჟიმში გაიმართა.

სტატისტიკის ეროვნული სამსახურის ცნობით, ბიუროს სხდომას გაეროს ESCAP-ის სტატისტიკის კომიტეტის თავმჯდომარის რანგში საქსტატის აღმასრულებელი დირექტორი გოგიტა თოდრაძე უძღვებოდა.

მათი ცნობით, ბიუროს დღევანდელი შეხვედრის მიზანს წარმოადგენდა სტატისტიკის კომიტეტის მეშვიდე სხდომაზე მიღებულ გადაწყვეტილებებთან დაკავშირებული ღონისძიებებისა და გაეროს სტატისტიკის კომისიის 52-ე სესიის დღის წესრიგში აზიისა და წყნარი ოკეანეთისთვის რეგიონალური მნიშვნელობის მქონე საკითხების განხილვა. მათ შორის, გაეროს მდგრადი განვითარების მიზნების 2030 წლის დღის წესრიგის განხორციელების პროგრესი, გარემოსდაცვითი ეკონომიკური ანგარიშები, მიგრაციის სტატისტიკა, დიდი მონაცემები და სხვა.

„მისასალმებელ სიტყვაში გოგიტა თოდრაძემ ისაუბრა პანდემიის დროს ჩვენს ქვეყანასა და მსოფლიო სტატისტიკის წინაშე არსებულ გამოწვევებზე. მან შეხვედრის მონაწილეებს გაეროს ESCAP-ის სტატისტიკური კომიტეტის მეშვიდე სხდომის შესახებ მიღებული პოზიტიური გამოხმაურებები და მათ განსახორციელებლად ბიუროს მიერ ჩატარებული სამუშაოები გააცნო. შეხვედრას ბიუროს წევრები, გაეროს ESCAP-ის სტატისტიკური განყოფილებისა და სხვადასხვა ქვეყნების სტატისტიკის სამსახურების ხელმძღვანელი პირები, ასევე საერთაშორისო და არასამთავრებო ორგანიზაციების წარმომადგენლები ესწრებოდნენ. შეხვედრის ბოლოს სტატისტიკის ეროვნული სამსახურის აღმასრულებელმა დირექტორმა მადლობა გადაუხადა გაეროს ESCAP-ის სტატისტიკის სამდივნოსა და მონაწილეებს, ღონისძების ორგანიზებისა და მომავალი ნაყოფიერი თანამშრომლობისთვის მზადყოფნა გამოთქვა“,-აღნიშნულია სტატისტიკის ეროვნული სამსახურის მიერ გავრცელებულ ინფორმაციაში.