„ახალგაზრდა იურისტთა ასოციაციის“ წარმომადგენლის ვახუშტი მენაბდის განცხადებით, საარჩევნო რეფორმაზე მომუშავე სამუშაო ჯგუფის მიერ საარჩევნო ადმინისტრაციის დაკომპლექტების შემოთავაზებული ვერსია, რომელიც ადმინისტრაციის წევრებიდან 8-ის პროფესიული ნიშნით და 9 წევრის პარტიული ნიშნით არჩევას გულისხმობს, მემორანდუმის მიზნებს არ იზიარებს.

მისივე თქმით, ის ამბიცია, რაც ამ მემორანდუმს აქვს, ამ ნაწილში მიუღწეველი დარჩება, თუ ეს შემოთავაზებული ვერსია, ამ ფორმით, იხილავს სინათლეს.

„რაც შემოგვთავაზეს, ეს მოდელი საარჩევნო ადმინისტრაციაში გულისხმობს 8 პროფესიულ წევრს ანუ არსებულ 6-ს კიდევ ორი დაემატება და 9 პარტიულ წარმომადგენელს ანუ ცესკოში თითო საპარლამენტო პარტიიდან თითო წარმომადგენელი დაინიშნება.

ჩვენი აზრით, ეს კონსენსუსური მოდელი არაა, ის კონსენსუსური, მოდელი, რაზეც ამდენი ხანია ვსაუბრობთ და რაც ცესკოს მუშაობის პრინციპის არსებითად ფუნდამენტური გადახედვა შეიძლება ყოფილიყო. ამიტომ, ჩვენ ვფიქრობთ, რომ ის ამბიცია რაც ამ მემორანდუმს აქვს, ამ ნაწილში მიუღწეველი დარჩება, თუ ეს შემოთავაზებული ვერსია, ამ ფორმით რა ფორმითაც განვიხილეთ, იხილავს სინათლეს.

ჩვენ ვმუშაობდით ამ პროცესში იმისთვის, რომ ცესკოს დაკომპლექტებაში ოპოზიციის მონაწილეობის ხარისხი გაზრდილიყო. კონსენსუსით, ორმხრივი მხარდაჭერით დაკომპლექტებულიყო ცესკო. სამწუხაროდ, ამ ეტაპზე, როგორც ჩანს, ამას არ იზიარებენ დეპუტატები, რაც ვფიქრობთ, რომ მემორანდუმის მიზნებს ეწინააღმდეგება“, - განაცხადა მენაბდემ.