ადამიანის უფლებათა ცენტრმა, N 8 პენიტენციური დაწესებულების მონიტორინგის ანგარიში გამოაქვეყნა.
ანგარიშში წარმოდგენილია 2020 წლის აგვისტოში N8 პენიტენციურ დაწესებულებაში ჩატარებული მონიტორინგის შედეგები და რეკომენდაციები.
ანგარიშში ნათქვამია, რომ პენიტენციურ დაწესებულებებში დაზიანებულია სამარტოო და უსაფრთხოების საკნები, ასევე დეესკალაციის ოთახები, რაც რემონტს საჭიროებს. მათი შეფასებით, დაწესებულებაში არსებული პირობები ადამიანის უფლებათა საერთაშორისო სტანდარტებთან შესაბამისობაში უნდა მოვიდეს. ანგარიშის თანახმად, პენიტენციურ დაწესებულებებში არსებული სანიტარულ-ჰიგიენური ნორმები დამაკმაყოფილებელი არ არის, რაც მოსაწესრიგებელია. ანგარიშის ავტორების განმარტებით, ასევე უნდა გაუმჯობესდეს სამედიცინო მომსახურების მიწოდების ხარისხი და დროულობა.
როგორც ადამიანის უფლებათა ცენტრში აცხადებენ, მინტორინგის ვიზიტები განახორციელეს არასამთავრობო ორგანიზაციების - ადამიანის უფლებათა ცენტრის და „ციხის საერთაშორისო რეფორმის“ წარმომადგენლებმა, საქართველოს სახალხო დამცველის პრევენციის ეროვნული მექანიზმის წარმომადგენლებთან ერთად.
მათივე ინფორმაციით, ანგარიში მომზადდა და გამოიცა ღია საზოგადოების ფონდისა და ევროკავშირის ფინანსური მხარდაჭერით. ავტორების მიერ ანგარიშში გამოთქმული მოსაზრებები შესაძლოა, არ გამოხატავდეს ფონდის, ევროკავშირის და სახალხო დამცველის პოზიციას. შესაბამისად, ისინი არ არიან პასუხისმგებელი მასალის შინაარსზე.
N 8 პენიტენციური დაწესებულების მონიტორინგის ანგარიში შეგიძლიათ იხილოთ ბმულზე.