არის დიდი შესაძლებლობა, რომ საქართველომ „კოვაქსის“ პლატფორმის მიღმა მიიღოს ვაქცინის მნიშვნელოვანი რაოდენობა,- ამის შესახებ საქართველოს საგარეო საქმეთა მინისტრობის კანდიდატმა დავით ზალკალიანმა კომიტეტების გაერთიანებულ სხდომაზე განაცხადა.
მისივე განმარტებით, ამ მიმართულებით მნიშვნელოვანი შედეგი საქართველოს უახლოეს დღეებში ექნება, რაც ზალკალიანის განმარტებით, ძალიან მნიშვნელოვანი იქნება პანდემიის წინააღმდეგ ბრძოლის პროცესში.
„სურვილი იყო, რომ „კოვაქსის“ პლატფორმის მიღმა მიეღო საქართველოს ვაქცინა და მე მქონდა ორმხრივ რეჟიმში კომუნიკაცია ჩვენს პარტნიორებთან, პოლონელ და ლიეტუველ პარტნიორებთან, ასევე შვედებთან. გაერთიანებულმა სამეფომ ძალიან დიდი როლი შეასრულა. არ მინდა მოვლენებს წინ გავუსწრო, მაგრამ უახლოეს პერიოდში, უახლოეს დღეებში, გვექნება მნიშვნელოვანი შედეგი იმ თვალსაზრისით, რომ არის დიდი შესაძლებლობა, საქართველომ „კოვაქსის“ პლატფორმის მიღმა მიიღოს ვაქცინის მნიშვნელოვანი რაოდენობა და როგორც კი ეს დადასტურდება, ვფიქრობ, რომ ეს იქნება ძალიან მნიშვნელოვანი ჩვენი საზოგადოებისთვის და იგივე პანდემიასთან ბრძოლის კუთხით. ყველა ჩვენს პარტნიორ ქვეყნას მინდა, დიდი მადლობა გადავუხადო დახმარებისთვის,“- განაცხადა ზალკალიანმა.