უზნაძეზე ქორწინების სახლი გაიხსნება

თბილისში, უზნაძის ქ. #2-ში დღეს ახლადგარემონტებული ქორწინების სახლის გახსნის საზეიმო ცერემონია გაიმართება.

როგორც ~ინტერპრესნიუსს~ სამოქალაქო რეესტრის სააგენტოდან აცნობეს, ღონისძიებაზე მიწვეულნი არიან საქართველოს მთავრობისა და პარლამენტის წევრები, თბილისის მერი, არასამთავრობო, დონორი ორგანიზაციების, საქართველოში აკრედიტებული დიპლომატიური კორპუსის წარმომადგენლები და სხვები.

ქორწინების სახლში განთავსებულია ორი სხვადასხვა დიზაინის სარიტუალო; დარბაზი. ქორწინების სახლის გარემონტებასთან ერთად, სამოქალაქო რეესტრის სააგენტო მუშაობს ქორწინების რიტუალის თანამედროვე, განსხვავებულ ფორმაზე, რომელთა შორის არჩევანს წყვილი გააკეთებს.

თბილისში უზნაძის ქ.№2-ში ქორწინების სახლი 1964 წლის 30 აგვისტოს გაიხსნა; და 1990 წლის ჩათვლით მოქმედებდა. ამ პერიოდში შენობაში 125 429 წყვილის ქორწინება დარეგისტრირდა. ყოფილი ქორწინების სახლი 1991 წლიდან ერთ-ერთ არასამთავრობო ორგანიზაციას დროებით სარგებლობაში ჰქონდა, 2006 წელს კი მთავრობამ მიიღო გადაწყვეტილება, უზნაძის ქ. №2-ს ქორწინების სახლის ფუნქცია დაებრუნებინა და შენობა იუსტიციის სამინისტროს სამოქალაქო რეესტრის სააგენტოს გადასცა.