ქვემო ქართლში სახელმწიფო რწმუნებული შოთა რეხვიაშვილი, საქართველოს პარლამენტში რუსთავისა და გარდაბნის მაჟორიტარი დეპუტატი, ნინო ლაცაბიძე და რუსთავის მერი ირაკლი ტაბაღუა, ახალგაზრდების იმ ჯგუფს შეხვდნენ, რომელთაც დღეს საწვავზე ფასების შემცირების მოთხოვნით საპროტესტო აქცია გამართეს და თბილისი რუსთავის დამაკავშირებელი ავტომაგისტრალი გადაკეტეს.
ხელისუფლების წარმომადგენლებმა აქციის მონაწილეების პოზიცია მოისმინეს და შემდეგი სამუშაო შეხვედრა დაგეგმეს.
როგორც დღევანდელ შეხვედრაზე გახდა ცნობილი, მომდევნო შეხვედრისას სამთავრობო გუნდთან კონსულტაციების შედეგად მიღებული გადაწყვეტილებები გაჟღერდება.
რუსთაველმა მძღოლებმა საპროტესტო აქცია გმირთა მემორიალის მიმდებარე ტერიტორიიდან დაიწყეს, შარტავას გავლით ქალაქის შემოსასვლელისკენ გადაინაცვლეს და გზა გადაკეტეს. ქვემო ქართლში სახელმწიფო რწმუნებულმა აქციის მონაწილეებს სამხარეო ადმინისტრაციაში შეხვედრა შესთავაზა. მძღოლებმა გზის გახსნის გადაწყვეტილება ამის შემდეგ მიიღეს.