თბილისის საქალაქო სასამართლოში გარდაცვლილი პროგრამისტის, თამარ ბაჩალიაშვილის დედის, თეონა თამაზაშვილის დაკითხვა მიმდინარეობს.

თამაზაშვილი ჩვენებას მაგისტრატი მოსამართლის წინაშე მტკიცებულებების ფალსიფიკაციის საქმეზე აძლევს, რომელიც საქმეში ახალი ფიგურანტის - მარიამ შარაშიძის მიერ ბაჩალიაშვილების ოჯახისთვის მიწოდებულ „სქრინებს" შეეხება.

როგორც ბაჩალიაშვილის ოჯახის ადვოკატი, ეკა ქობესაშვილი აცხადებს, გამოძიებას მოწმისგან ამოღებულ მობილურ ტელეფონზე ექსპერტიზა ამ დრომდე არ დაუსრულებია.

„თეონა თამაზაშვილი სასამართლოს ჩვენებას მისცემს იმ ფაქტთან დაკავშირებით, რაც უკავშირდება „სქრინებს", რომელიც მარი შარაშიძემ წარმოადგინა ჩვენ წინაშე. ის ამბობს, რომ ხშირი მიმოწერა ჰქონდა ბაჩალიაშვილთან და თამუნა მას უყვებოდა, თუ როგორ ემუქრებოდა საფრთხე. ამასთან დაკავშირებით საქმის გამოძიება დაიწყო მტკიცებულებების ფალსიფიკაციის ფაქტზე. გამოძიებას არ ჰქონდა ეს „სქრინები" ნანახი, არც მოწმეებთან არ ჰქონდათ გასაუბრება ჩატარებული, ისე დაიწყეს გამოძიება. ეს ყველაფერი მოხდა ისე, რომ არც ექსპერტიზის დასკვნა არ იყო და არ ვიცოდით, მტკიცებულება იყო თუ არა გაყალბებული. თეონა სასამართლოს ჩვენებას მისცემს იმასთან დაკავშირებით, თუ რა ურთიერთობა აქვს მას მარიამთან და როგორ მოხდა ამ „სქრინების“ მოპოვება თეონა თამაზაშვილის მიერ. ჩვენი ინფორმაციით, შარაშიძისგან ამოღებულ ტელეფონზე ექსპერტიზა არ არის დასრულებული და გამოძიებას არ შეუძლია გვითხრას, ეს „სქრინები" დამონტაჟებული იყო თუ რეალური",- განაცხადა ქობესაშვილმა.

ცნობისთვის, ადვოკატებმა პროკურატურაში თამარ ბაჩალიაშვილის მეგობართან მიმოწერის ამსახველი „სქრინი" წარადგინეს. უფლებადმცველების თქმით, თამარ ბაჩალიაშვილი მეგობარს წერს: „გარკვეული საშიშროება მელის, თუ რამე დამემართება, დედაჩემს დაუდექი გვერდით, შენთან მიმოწერა რომ მაქვს, უნდა წავშალო, რამე საშიშროება რომ არ შეემთხვას“.

იხილეთ ვიდეო:თამარ ბაჩალიაშვილის დედა მაგისტრ მოსამართლესთან იკითხება