მიანმარში სამხედრო გადატრიალების წინააღმდეგ დღეს გამართული საპროტესტო აქციების დროს კიდევ 7 ადამიანი დაიღუპა, - ამის შესახებ ინფორმაციას Reuters-ი ავრცელებს.
სააგენტოს ცნობით, აქციის მონაწილეები უსაფრთხოების ძალების მიერ გახსნილ ცეცხლს ემსხვერპლნენ.
გავრცელებული ინფორმაციით, 6 ადამიანი ქალაქ მაინგში, 1 კი ქვეყნის უდიდეს ქალაქ იანგონში დაიღუპა. დღეს დაღუპული ადამიანების შესახებ ინფორმაციის გავრცელებამდე „პოლიტპატიმრების დახმარების ასოციაციამ“ განაცხადა, რომ მიანმარში 1-ელი თებერვლის სამხედრო გადატრიალების შემდეგ მიმდინარე საპროტესტო აქციებისას 60-ზე მეტი მომიტინგე დაღუპა. ამასთან, აღნიშნული პერიოდის განმავლობაში უსაფრთხოების ძალებმა 2 000-მდე ადამიანი დააკავეს.