ბათუმის მერიამ ველოსისტემის გენერალური გეგმის შემუშავება დაიწყო

ბათუმის მერიამ ველოსისტემის გენერალური გეგმის შემუშავების საკითხზე დაიწყო მუშაობა.

ამის შესახებ, „ინტერპრესნიუსს“ ბათუმის მერიის პრესსამსახურიდან აცნობეს.

მათივე ინფორმაციით, აღნიშნულთან დაკავშირებით, საერთაშორისო და ადგილობრივ ექსპერტებთან ონლაინ შეხვედრა გაიმართა.

უწყების ცნობით, გენერალურ გეგმაში გათვალისწინებული იქნება პოტენციური ველომომხმარებლებისა და სხვა დაინტერესებული მხარეების საჭიროებები, ასევე ასახული იქნება ინფრასტრუქტურასა და დიზაინის შემუშავებასთან დაკავშირებული რეკომენდაციები.

როგორც მერიაში განმარტავენ, გეგმის მიზანი ქალაქში ველოსიპედით გადაადგილების პირობების გაუმჯობესებაა.

არჩილ ჩიქოვანის თქმით, ბათუმის მერია აქტიურად მუშაობს მწვანე სატრანსპორტო სისტემების მოდერნიზების პროექტზე.

„პროექტის ერთ-ერთი შემადგენელი ნაწილი ველოსიპედით მოსარგებლეთა გადაადგილების გენერალური გეგმის შემუშავებაა, რაზედაც ჩვენ მუშაობა დღეს დავიწყეთ. ჩვენი საერთაშორისო პარტნიორების ჩართულობით, ადგილობრივი და საერთაშორისო ექსპერტების მონაწილეობით, მივიღებთ ჩარჩო დოკუმენტს, რომელიც მნიშვნელოვანია მომხმარებელთა სერვისების გასაუმჯობესებლად და მწვანე სატრანსპორტო სისტემების მოდერნიზებისათვის“, - განაცხადა არჩილ ჩიქოვანმა.

მისივე თქმით, პრაქტიკულად, რამდენიმე თვეში მზად იქნება პროექტი, რომელიც გაიზიარებს საუკეთესო საერთაშორისო პრაქტიკას და იქნება მორგებული ადგილობრივ ინფრასტრუქტურაზე. ველოსიპედით გადაადგილების გენერალური გეგმის შემუშავება ხორციელდება „მდგრადი ურბანული მობილობა სამხრეთ კავკასიაში“ (Mobility4Cities) - რეგიონულ პროგრამასთან თანამშრომლობით, რომელიც დაფინანსებულია გერმანიის ეკონომიკური თანამშრომლობისა და განვითარების ფედერალური სამინისტროს (BMZ) მიერ.

იოსებ ბარათაშვილი - სააკაშვილის პატიმრობაში ყოფნა საქართველოს  ხელისუფლებას საკმაოდ  რთული პრობლემის წინაშე აყენებს
ქართული პრესის მიმოხილვა 18.10.2021
ვახტანგ ძაბირაძე - თუ ხელისუფლება და ოპოზიცია მეორე ტურის უკეთ გასაკონტროლებლად კონკრეტულ მექანიზმებზე ვერ შეთანხმდნენ, მაშინ გამოვა, რომ ორივე მხარე შეგნებულად მიდის ვითარების გამწვავებაზე
„გორგია“ ბათუმში დაზარალებულ ყველა ოჯახს მათთვის საჭირო ტექნიკას, ავეჯსა და საყოფაცხოვრებო ნივთებს გადასცემს