მერებს უფლება ეძლევათ, აუქციონის ფორმით პრივატიზებული ან სარგებლობის უფლებით გადაცემული ქონების მიმღები პირებისთვის საინვესტიციო პირობები შეცვალონ ან გააუქმონ.

„ადგილობრივი თვითმმართველობის კოდექსში“ დაგეგმილი ცვლილებები, რაც თავის მხრივ, კოვიდ-პანდემიას უკავშირდება, პარლამენტის პლენარულ სხდომაზე პირველი მოსმენით განიხილეს და 78-ხმით მიიღეს.

პროექტის გათვალისწინებით მერებს უფლებამოსილება ეძლევათ, არაუგვიანეს 2021 წლის 1-ელი სექტემბრისა, საკრებულოს თანხმობით მიიღონ გადაწყვეტილება, სარგებლობის ან მართვის უფლებით გადაცემული მუნიციპალიტეტის ქონების მიმღებისათვის პირობების შეცვლის ან გაუქმების შესახებ.

ინიციატორთა განმარტებით, კორონავირუსის პანდემიიდან გამომდინარე, მთელი რიგი ეკონომიკური აქტივობები შეფერხდა, რაც მუნიციპალიტეტის ქონების პრივატიზებული ან სარგებლობის უფლებით გაცემული ქონების მიმღებთა მხრიდან ნაკისრი პირობების შესრულებას ართულებს. აღნიშნულიდან გამომდინარე კი, სასურველია დაწესდეს გარკვეული შეღავათები ბიზნეს სექტორისთვის.

ცნობისთვის, აღნიშნული უფლებამოსილება თბილისის მთავრობას უკვე მიეცა და ეს შესაძლებლობა პარლამენტის მიერ კანონის მიღების შემდეგ, ყველა მუნიციპალიტეტზე გავრცელდება.