ევროკავშირის წარმომადგენლობის ოფისში „ქართული ოცნებისა“ და ოპოზიციური პარტიების ლიდერების შეხვედრა მიმდინარეობს.

შეხვედრა ევროპული საბჭოს პრეზიდენტის, შარლ მიშელის სპეციალური წარმომადგენლის კრისტიან დანიელსონის მედიაციით იმართება.

ოპოზიციისა და მმართველი გუნდის წარმომადგენლები კრისტიან დანიელსონის ჩართულობით ამ ტიპის შეხვედრაში პირველად მონაწილეობენ.

შეგახსენებთ, რომ ხელისუფლებასა და ოპოზიციას შორის მოლაპარაკებებში მედიატორი კრისტიან დანიელსონია, რომელიც ევროპული საბჭოს პრეზიდენტმა შარლ მიშელმა თბილისში საკუთარ წარმომადგენლად დანიშნა. ის საქართველოში 12 მარტს ჩამოვიდა. მას შემდეგ ცალკ-ცალკე გამართა შეხვედრები როგორც ხელისუფლების, ასევე ოპოზიციის წარმომადგენლებთან და არასამთავრობო სექტორთან.