თურქმა სამართალდამცავებმა სტამბოლის ოთხ რაიონში სპეცოპერაცია ჩაატარეს და 10 ადამიანი დააკავეს, - ამის შესახებ ინფორმაციას Reuters-ი ადგილობრივ მედიაზე დაყრდნობით ავრცელებს.

მათივე ინფორმაციით, დაკავებულებს შორის პროქურთული “სახალხო დემოკრატიული პარტიის“ სამი წევრია.

თურქული მედიის ინფორმაციით, ოპერაციისთვის, რომლის სამიზნე ქურთი “ბოევიკები” იყვნენ, საერთო ჯამში, დაპატიმრების 15 ორდერი იყო გაცემული.

შეგახსენებთ, ორი დღის წინ თურქეთის პროკურატურამ საკონსტიტუციო სასამართლოს პროქურთული პარტიის დაშლის მოთხოვნით მიმართა. აღნიშნულ ფაქტს აშშ-ის სახელმწიფო დეპარტამენტი გამოეხმაურა და განაცხადა, რომ ეს ნაბიჯი კიდევ უფრო მეტად გამოუთხრის ძირს თურქეთის დემოკრატიას. თურქეთის ხელისუფლება „სახალხო დემოკრატიულ პარტიას“ „ქურთისტანის მუშათა პარტიასთან“ კავშირში ადანაშაულებს.

“სახალხო დემოკრატიული პარტია“ ბოევიკებთან ყველანაირ კავშირს უარყოფს და აცხადებს, რომ პროკურატურა პოლიტიკური დაკვეთებით მოქმედებს.