კოვიდ 19-ის ინფექციის დაფიქსირების გამო, ქარელის მუნიციპალიტეტში, ბრეძის საჯარო სკოლა დღეიდან დისტანციურ სწავლებაზე გადავიდა. ახალი კორონავირუსი სკოლის პედაგოგს დაუდასტურდა, რომელიც ბოლო დღეების განმავლობაში გაკვეთილებს ატარებდა და შესაბამისად, კოლეგებსა და მოსწავლეებთან კომუნიკაცია ჰქონდა.
„გუშინ გახდა ცნობილი, რომ ტესტირებისას, ბრეძის საჯარო სკოლის ერთ-ერთ პედაგოგს დაუდასტურდა კოვიდინფექცია. მაშინვე მივიღეთ რეკომენდაცია, რომ აღნიშნულ სკოლას დისტანციური რეჟიმით გაეგრძელებინა სასწავლო პროცესი, ბუნებრივია, ამის თაობაზე მივმართეთ სამინისტროს. სხვა შემთხვევები არ გვაქვს და ყველა საჯარო სკოლა ჩვეულ რეჟიმში აგრძელებს ფუნქციონირებას, გამონაკლისი გახლავთ ახალსოფლის საჯარო სკოლა, სადაც მშობლების მოთხოვნით, საგანმანათლებლო პროცესი დისტანციურად მიმდინარეობს“, - განაცხადა „ინტერპრესნიუსთან“ ქარელის საგანმანათლებლო რესურსცენტრის დირექტორმა გიორგი კობახიძემ.