ისრაელის ელჩი საქართველოში რან გიდორი ონის მუნიციპალიტეტში იმყოფებოდა. რაჭა-ლეჩხუმ ქვემო სვანეთის სახელმწიფო რწმუნებულმა პაპუნა მარგველიძემ, რაჭა-ლეჩხუმ სვანეთის მაჟორიტარი დეპუტატის ბიუროს ხელმძღვანელმა ქრისტინე კობახიძემ, სახელმწიფო რწმუნებულის პირველმა მოადგილემ გიორგი მაქარაშვილმა, სახელმწიფო რწმუნებულის აპარატის უფროსმა, ირმა მაქარაშვილმა და ონის მუნიციპალიტეტის მერმა, დავით ჩიკვაიძემ ელჩს ადგილობრივი ღირსშესანიშნავი ადგილები დაათვალიერებინეს.
როგორც „ინტერპრესნიუსს“ რაჭა-ლეჩხუმისა და ქვემო სვანეთის რეგიონში სახელმწიფო რწმუნებულის გუბერნატორის ადმინისტრაციიდან აცნობეს, ისრაელის ელჩმა ონის ცენტრში მდებარე სინაგოგა მოინახულა, რომელიც საქართველოში მე-19 საუკუნეში არის აგებული და კულტურის ძეგლის სტატუსს ატარებს. ონის სინაგოგას წელს 125 წელი შეუსრულდა და ის, ქართველი და ებრაელი ერის 26 საუკუნოვანი მეგობრობის სიმბოლოა.
მათივე ინფორმაციით, ისრაელის ელჩმა ონში სტუმრობისას, ასევე მოინახულა: ჰოლოკოსტის მსხვერპლთა მემორიალი, მხარეთმცოდნეობის მუზეუმი, ებრაელთა სასაფლაო, სერგი მეტრეველის სახლი და კურორტი შოვი.
რან გიდორმა რეგიონული და ადგილობრივი ხელისუფლების წარმომადგენლებს მასპინძლობისთვის მადლობა გადაუხადა. ასევე, სამომავლო ურთიერთთანამშრომლობისათვის მზადყოფნა გამოთქვა.