ბოლნისის მუნიციპალიტეტის დაბა კაზრეთის ორ საჯარო სკოლაში და საბავშვო ბაღში, ასევე სოფელ ბალიჭის საბავშვო ბაღში სასწავლო-სააღმზრდელო პროცესი შეწყდა. ამის მიზეზი, აღნიშნულ სოფლებში კორონავირუსით ინფიცირების 8 შემთხვევა გახდა. როგორც „ინტერპრესნიუსთან" საუბარში ბოლნისის საზოგადოებრივი ჯანდაცვის ცენტრის ხელმძღვანელმა მაკა მამარდაშვილმა განაცხადა, ბოლო 12 დღის განმავლობაში ბოლნისის მუნიციპალიტეტში სულ 14 შემთხვევაა დაფიქსირდა, აქედან 8 კაზრეთში და ბალიჭში.
„რადგან ინფიცირების წყარო ერთსექციური არ იყო და კონტაქტების წრე საკმაოდ დიდია, მივიღეთ გადაწყვეტილება ერთი ინკუბაციური პერიოდი -12 დღე დროებით შეგვეჩერებინა სასწავლო პროცესი. ბოლო 12 დღის განმავლობაში ბოლნისის მუნიციპალიტეტში 14 ინფიცირების შემთხვევა გვაქვს, აქედან 8 სოფელ ბალიჭში და დაბა კაზრეთში", - განაცხადა მაკა მამარდაშვილმა.