„მიუხედავად პანდემიისა და ეკონომიკური სირთულეებისა, გაფართოვებული, განვითარებას დაქვემდებარებული აეროპორტი და ახალი ინფრასტრუქტურა დაგვეხმარება ძალიან მალე შევძლოთ ეკონომიკური დინამიკის აღდგენა როგორც რეგიონში, ასევე ქვეყანაში“, - ამის შესახებ აჭარის მთავრობის თავმჯდომარემ თორნიკე რიჟვაძემ ბათუმის საერთაშორისო აეროპორტის ახალი ტერმინალის გახსნისას განაცხადა.
რიჟვაძის თქმით, ბათუმის საერთაშორისო აეროპორტი განახლებული ინფრასტრუქტურით შესაბამისობაშია გლობალურ ტენდენციებთან.
„მისასალმებელია, რომ ძალიან მოკლე ვადებში ოპერატორმა კომპანიამ შეძლო მართლაც შთამბეჭდავი სამუშაოები განეხორციელებინა და ბათუმის საერთაშორისო აეროპორტი დღეს უკვე განახლებული ინფრასტრუქტურით შესაბამისობაშია გლობალურ ტენდენციებთან. ამისთვის კიდევ ერთხელ მადლობა კომპანიის წარმომადგენლებს, შესაბამის სამინისტროებს, საქართველოს მთავრობას, ვინაიდან ჩვენ დიდი გამოწვევის ფონზე 8 თვეში შესაძლებელი გახდა, რომ ეს აეროპორტი დასრულებულიყო, გაფართოვებულიყო მისი გამტარუნარიანობის შესაძლებლობები და ეს მოგვცემს საშუალებას, რომ უკვე ზაფხულისთვის შევძლოთ და ტურისტები დავუბრუნოთ როგორც ბათუმს და აჭარას, ასევე მთლიანად ქვეყანას“, - განაცხადა რიჟვაძემ.