უკრაინის პრეზიდენტმა ვლადიმერ ზელენსკიმ საკონსტიტუციო სასამართლოს თავმჯდომარე ალექსანდრ ტუპიცკი თანამდებობიდან გაათავისუფლა, - Reuters-ის ინფორმაციით, ამის შესახებ ზელენსკის ოფისის მიერ გავრცელებულ განცხადებაშია აღნიშნული.

მათივე ინფორმაციით, ვლადიმერ ზელენსკიმ შესაბამის განკარგულებას ხელი უკვე მოაწერა.

”ვიქტორ იანუკოვიჩის მიერ დანიშნული უკრაინის საკონსტიტუციო სასამართლოს გარკვეული მოსამართლეები, რომლებიც განაგრძობენ თავიანთი უფლებამოსილების განხორციელებას, საფრთხეს უქმნიან უკრაინის სახელმწიფოს დამოუკიდებლობას და ეროვნულ უსაფრთხოებას”, - ნათქვამია პრეზიდენტის ვებგვერდზე გამოქვეყნებულ დოკუმენტში.

აღსანიშნავია, რომ ოქტომბერში საკონსტიტუციო სასამართლომ შეაჩერა რამდენიმე ანტიკორუფციული კანონი, რომელიც ოფიციალური პირების ქონების დეკლარაციებს ეხებოდა და კორუფციის პრევენციის ეროვნულ სააგენტოს მნიშვნელოვანი უფლებამოსილებები ჩამოართვა.

ალექსანდრ ტუპიცკი საკონსტიტუციო სასამართლოს თავმჯდომარის თანამდებობაზე ყოფილმა პრეზიდენტმა ვიქტორ იანუკოვიჩმა 2013 წელს დანიშნა.